Qaraǵandylyq Ekaterına Aıdova Olımpıadanyń 3 lıtsenzııasyna ıe boldy

QARAǴANDY. QazAqparat – Qaraǵandylyq konkımen júgirýshi Ekaterına Aıdova Kalgarı qalasynda (Kanada) ótken Álem kýbogynyń IV kezeńinde sátti óner kórsetti. Sportshy úsh olımpıadalyq lıtsenzııanyń ıegeri atandy, dep habarlaıdy QazAqparat tilshisi.

Kalgarı jarysynda Ekaterına Aıdova «V» tobynda 500 m qashyqtyqta birinshi oryn aldy. «A» tobynda 1000 m qashyqtyqta ol toǵyzynshy orynǵa ıe boldy, 1500 metrde – 15-shi oryn.

Qaraǵandylyq sportshy 500 jáne 1000 metrge júgirýden Qazaqstannyń jańa rekordyn ornatty.

Álem kýboktarynyń tórt kezeńinde óner kórsetý qorytyndysy boıynsha Ekaterına Aıdova 500, 1000, 1500 metr qashyqtyqta Beıjińde (Qytaı) XXIV qysqy Olımpıada oıyndaryna qatysýǵa úsh lıtsenzııa jeńip aldy. Planetanyń basty jarystary 2022 jyldyń 4-20 aqpan aralyǵynda ótedi.

«Taǵy úsh qaraǵandylyq qysqy Olımpıadaǵa joldama aldy. Konkımen júgirýshi Stanıslav Palkın (1000, 1500 m) jáne bıatlonshylar Lıýdmıla Ahatova men Vladıslav Kıreev olımpıadalyq lıtsenzııalar úshin kúresýde. Lıýdmıla Ahatova Abertılıha qalasynda ótken bıatlonnan Avstrııanyń ashyq chempıonatynda altyn jáne kúmis medaldardy jeńip aldy. Ol 10 shaqyrymdyq jarysta jeńiske jetip, 7,5 shaqyrymdyq sprıntte ekinshi orynǵa ıe boldy», - dep habarlady Qaraǵandy oblysynyń dene shynyqtyrý jáne sport basqarmasy baspasóz qyzmeti.