Qaraǵandylyq dárigerler múgedekterdi úıine baryp tekseredi
Qaraǵandy oblysynda medıtsınalyq saqtandyrý júıesin engizgennen keıin skrınıngten ótken turǵyndar sany artty. Bul jaıt №1 Qaraǵandy kópsalaly aýrýhanasynyń mysalynda baıqalyp otyr. Medıtsınalyq mekemege 77 myńnan astam adam tirkelgen. Tek sońǵy eki apta ishinde aýrýhananyń 632 emdelýshisi adyn ala tekserýden ótti, onyń ishinde 110 patsıentti medıtsına qyzmetkerleri úıine baryp teksergen. Buryn skrınıngten ótý úshin múmkindigi shekteýli emdelýshiler klınıkaǵa kelýge tıis bolatyn. Olar dárigerdi úıine tek aýyr dertke shaldyqqanda jáne erekshe nusqaýlyq bolsa ǵana shaqyra alatyn.
Endi Qaraǵandy oblysynyń emhanalaryna aldyn alý tekserýden ótkizý úshin jeke soma bólinip otyr. Al qyrkúıekten bastap MÁMS júıesi engizilgeli bul soma 1.8 mlrd teńgeden asty. Buryn skrınıngke qajet qarajat medıtsınalyq mekemege bekitilgen ár adamǵa bólingen biryńǵaı tólemge salynatyn.
Osynyń arqasynda qazir oblysta emhanaǵa óz betinshe kele almaıtyn adamdardy profılaktıkalyq tekserý artady.
Aldyn ala tekserýden ótetin emdelýshiler tizimi emhanada jynysy, jasy jáne densaýlyq jaǵdaıyna qaraı jasalady. Tekserý kezinde kóz jáne qan qysymyn, qandaǵy qant pen holesterın deńgeıin ólsheıdi, taldaýǵa materıal alady jáne qandaı da bir aýrýlardy anyqtaý úshin qajetti testiler júrgizedi. Múmkindigi shekteýli adamdar úıde nemese onlaın rejımde sala mamandarynan keńes ala alady.
Esterińizge sala keteıik, Qaraǵandy oblysynda mindetti medıtsınalyq saqtandyrý júıesi pılottyq rejımde osy jyldyń 1 qyrkúıeginde engizilgen bolatyn. Elimizdiń basqa óńirlerinde júıe 2020 jyldyń basynan bastap jumys isteıdi.