Qaraǵandylyq ardagerlerdi saılaý ýchaskesine avtoklýb músheleri jetkizip jatyr

SARAN. QazAqparat – Qaraǵandy oblysynyń Saran qalasynda Volkswagen T4 avtoklýbynyń qatysýshylary qalalyq Ardagerler keńesiniń múshelerin saılaý ýchaskelerine alyp barýda, dep habarlaıdy QazAqparat tilshisi.

«Biz bul aktsııany ózimiz ótkizýdi sheshtik. Ardagerler – eń jaýapty saılaýshylar, saılaýǵa birinshi bolyp barady. Biz olardy úılerinen saılaý ýchaskelerine apardyq, sodan keıin qajet bolǵan jaǵdaıda súıemeldep, erip júrdik. Daýys berip bolǵan soń úılerine jetkizdik», – deıdi avtoklýbqa qatysýshylardyń biri Alekseı Arhıpov.

Aǵa býyn avtokólik áýesqoılarynyń bastamasyna qýanyp, alǵys bildirip jatyr.

«Saılaý – Qazaqstan Respýblıkasyndaǵy saıası protsestiń mańyzdy bóligi. Avtoklýb jastary bizdi saılaý ýchaskelerine aparýdy usyndy. Biz olardyń osyndaı kómegine óte rızamyz», – dep bólisti Saran qalasynyń Qurmetti azamaty, Ardagerler keńesiniń saýda jáne tamaqtaný bastaýysh uıymynyń tóraıymy Aıman Haırýllına.

Bul Saran avtoklýbynyń uıymdastyrǵan alǵashqy ıgi isi emes. Jeńis kúni júrgizýshiler toby qaza tapqan batyrlarǵa gúl shoqtaryn qoıý úshin ardagerlerdi eskertkishterge aparyp qaıtqan bolatyn.