Qaraǵandylyq agrarshylardyń tájirıbesin respýblıka boıynsha taratý usynyldy

QARAǴANDY. QazAqparat – Májilismender Qaraǵandy oblysynyń ákimi JeńisQasymbekpen kezdesti. Óńir basshysy AÓK damýy týraly aıtyp berdi, dep habarlaıdy QazAqparat tilshisi.

Oblys ákimdiginde QR Parlamenti Májilisiniń Agrarlyq máseleler komıtetiniń kóshpeli otyrysy ótti. Oǵan aýyl sharýashylyǵy vıtse-mınıstri Jeńis Óserbaı, saýda jáne ıntegratsııa vıtse-mınıstri Erjan Qazanbaev, sondaı-aq aýyl sharýashylyǵy taýaryn óndirýshiler qatysty. Azyq-túlik qaýipsizdigin nyǵaıtý jáne azyq-túlik baǵasyn tómendetý, kóterme-taratý ortalyqtary jelisin damytý máseleleri talqylandy.

«8 aıdyń qorytyndysy boıynsha oblysta aýyl sharýashylyǵynyń jalpy ónim óndirisiniń kólemi 3,7% ósimmen 217,8 mlrd teńgeni qurady. Dándi daqyldardy jınaý aıaqtaldy. 9,3 ts/ga ortasha ónimdilik kórsetkishimen 894 myń tonna, onyń ishinde 727 myń tonna bıdaı jınaldy. 109 myń tonna astyq tuqymy sebildi», – dep habarlady Qaraǵandy oblysy ákiminiń orynbasary Serik Shaıdarov.

Ol oblysta ishki óndiris esebinen júz paıyz qamtamasyz etiletin ónimder tizimin aıtty. Bul 1-shi surypty bıdaı uny, 1-shi surypty unnan pisirilgen nan, kartop, sıyr eti, qus eti, makaron ónimderi, jumyrtqa, sábiz. Ónimderdiń taǵy alty túri boıynsha qamtamasyz etilý ishinara 49%-ǵa deıingi kórsetkishti qurady.

Óńirdegi áleýmettik mańyzy bar azyq-túlik taýarlarynyń 19 ataýdan quralǵan tizimnen 14-i shyǵarylady.

Bıyl oblysta AÓK salasynda 13 joba júzege asyryldy, taǵy ekeýi jyl sońyna deıin iske asyrylady dep josparlanǵan. Oblys ákimi orynbasarynyń aıtýynsha, aýyl sharýashylyǵynda memlekettik qoldaý sharalary 5 jylda 2,6 esege artqan.

Depýtattardyń pikirinshe, Qaraǵandy oblysynyń paıdaly tájirıbesin basqa óńirlerde de qoldanýǵa bolady.

«Aýylǵa basa nazar aýdara otyryp, ekonomıkanyń naqty sektoryn damytý basymdyq bolyp tabylady. Qaraǵandy oblysy ónerkásiptik óńir, degenmen jergilikti agrarshylar da jetkilikti ónim óndiredi. Bul baǵany turaqtandyrýǵa yqpal etedi. Bul aqparat salany damytý jáne Memleket basshysy alǵa qoıǵan mindetterdi sheshý úshin óte mańyzdy.

Aýyl sharýashylyǵy taýarlaryn óndirýshiler birqatar problemalardy atap ótti. Keıbireýlerin Úkimet deńgeıinde sheshýge bolady, zańnamalyq bastamalardy talap etetinder de bar», – dep atap ótti depýtat Aıqyn Qońyrov.

Kóshpeli keńes nátıjeleri boıynsha ýákiletti organdarǵa usynymdar beriledi.