Qaraǵandyǵa EQYU halyqaralyq baıqaýshylary keldi

QARAǴANDY. QazAqparat - Qaraǵandy oblysynyń ákimi Erlan Qoshanov Eýropadaǵy qaýipsizdik jáne yntymaqtastyq uıymynyń Demokratııalyq ınstıtýttar men adam quqyqtary jónindegi bıýrosy mıssııasynyń baıqaýshylary Martın Rossman men Kamıl Forımen kezdesti, dep habarlaıdy QazAqparat tilshisi.

Halyqaralyq baıqaýshylar Qaraǵandy óńirinde QR Prezıdentiniń kezekten tys saılaýy kúnine deıin jumys isteıtin bolady. Daýys berýge deıin olar saılaý ýchaskeleriniń daıyndyǵyn baqylap, saılaý aldy jaǵdaıyn baǵalaıdy.

Qazirgi tańda Qazaqstanda EQYU-nan 22 uzaq merzimdi baıqaýshy jumys isteıdi. Buǵan qosa 9 maýsymǵa deıin elimizge qysqa merzimdi baıqaýshylar da keledi. Olar saılaý ýchaskelerinde daýys berý barysyn jáne daýystardy sanaýdy qadaǵalaıdy.

Bizdiń óńirde halyqaralyq baıqaýshylar Qaraǵandy, Temirtaý jáne Shahtınsk qalalaryndaǵy saılaý ýchaskeleriniń jumysyna qatysýdy josparlap otyr.

Saılaý kúni Qazaqstanda 200-den astam sheteldik baıqaýshy jumys isteıtin bolady.

«Qazir biz saılaý komıssııalarymen, qalalar men aýdandardyń ákimshilik ókilderimen kezdesip jatyrmyz. Al elordada biz Prezıdent laýazymyna kandıdattarmen jáne shtab múshelerimen kezdesýler ótkizemiz», - dep túsindirdi Martın Rossman.

Erlan Qoshanov mıssııaǵa qatysýshylarǵa Qaraǵandy oblysy týraly jáne saılaýǵa daıyndyq týraly aıtyp berdi. Óńirde saılaýshylar tizimi jańartyldy - jańa tizimde 938 myń adam bar. Olar úshin 787 saılaý ýchaskesi jumys isteıtin bolady. Árqaısysyna múmkindigi shekteýli adamdardyń qajettiligi eskeriletin bolady.

Esterińizge sala keteıik, Qaraǵandy oblysynda kásipkerler qaýymdastyǵy bazasynda sheteldik baıqaýshylarǵa kómek kórsetý ortalyǵy quryldy. Bul jerde olarǵa óńir boıynsha transfer, baspasóz konferentsııalaryn ótkizý jáne jumys isteý úshin alańdar usynyp, qajetti túsiniktemeler berip, tipti bos ýaqytyn uıymdastyrý da qarastyrylǵan.