Qaraǵandydan Ekibastuzǵa kómektesýge taǵy 70 maman attandy

QARAǴANDY. QazAqparat - Qaraǵandydan osymen jetinshi kún jylýsyz otyrǵan Ekibastuz qalasyna qalpyna keltirý jumystaryna at alysý úshin qurylys jáne kommýnaldyq kásiporyndardyń bir top qyzmetkeri attandy, dep habarlaıdy QazAqparat.

Qaraǵandy qalasynyń ákimi Ermaǵanbet Bólekbaev Instagram-daǵy paraqshasynda Ekibastuzda jylýmen qamtýdy qalpyna keltirý úshin Qaraǵandydan 70 maman jolǵa shyqqanyn jazdy.

«Oblys ákiminiń tapsyrmasy boıynsha qurylys jáne kommýnaldyq kásiporyndar qyzmetkerlerinen brıgada quryldy. Kúndiz qajetti quraldarmen jáne tehnıkamen tolyq jabdyqtalǵan mamandarymyz Ekibastuzǵa attandy. Qazirgi ýaqytta olar qajetti jumystarǵa kiristi. «Energotsentr» JShS,»Qaraǵandy Sý» JShS, qalanyń qurylys kompanııalary men barlyq qaraǵandylyqtarǵa shyn júrekten alǵys aıtamyn», - dep jazdy ol.

Aıta keteıik, buǵan deıin Ekibastuzda jylýdy qalpyna keltirý jumysyna 484 adam jumyldyrylǵanyn jazǵan bolatynbyz.