Qaraǵandydaǵy kólik apaty: Tórt adamnyń jaǵdaıy aýyr
Qaraǵandy oblysynyń Densaýlyq saqtaý basqarmasynda DSK mańynda eki avtobýstyń soqtyǵysýy kezinde zardap shekkenderdiń jaǵdaıy týraly málimdedi.
Dárigerlerdiń aıtýynsha, aýrýhanaǵa 18 adam jetkizilgen.
«Búgingi kúnge barlyǵy 18 adam jetkizildi. Olardyń tórteýi aýyr jaǵdaıda. Ahýal ortalyǵynyń jedel jumysynyń arqasynda naýqastar statsıonarlarǵa bólindi. Turaqty dınamıkasy bar eki patsıent Ońtústik-Shyǵystaǵy bazaǵa (H. J. Maqajanov atyndaǵy kópsalaly aýrýhana) attandyryldy. Bizdiń aýrýhanada óte aýyr haldegi eki adam qaldy. Munda jergilikti statsıonardyń jáne bizdiń hırýrgtardyń kúshimen operatsııalyq blok jaǵdaıynda shokqa qarsy-reanımatsııalyq is-sharalar bastaldy. Hırýrgtar toby uıymdastyryldy, onyń quramyna medıtsına ýnıversıtetiniń qyzmetkerleri osy jerde jumys atqaratyn hırýrgtar kirdi. Ońtústik-Shyǵystan da hırýrgter tartyldy. Ol jaq-bet hırýrgy, oftalmolog, neırohırýrg jáne ish hırýrgy. Qazirgi ýaqytta naýqastardyń jaǵdaıy aýyr. Qarqyndy terapııa júrgizilýde», - dep túsindirdi H. J. Maqajanov atyndaǵy kópsalaly aýrýhananyń travmotologııalyq ortalyǵynyń jetekshisi Berik Tóleýbaev.
Esterińizge sala keteıik, búgin tańerteń Qaraǵandyda eki jolaýshylar avtobýsy soqtyǵysqan bolatyn. Saldarynan qoǵamdyq kólik júrgizýshileriniń biri qaza tapty.
Vıdeodan alynǵan kadr