Qaraǵandydaǵy 12 mektepke «bomba qoıyldy»

QARAǴANDY. QazAqparat - Búgin tańerteń Qaraǵandy qalasynyń 12 mektebine jarylǵysh zat qoıylǵany týraly aqparat túsken, dep habarlaıdy QazAqparat tilshisi.

«22 jeltoqsan kúni saǵat 11-den bastap Qaraǵandy qalalyq polıtsııa bóliminiń kezekshi bólimshelerine qaladaǵy 12 mektepke jarylǵysh zat ornatylǵany týraly habarlamalar túse bastaǵan. Jedel tekserý barysynda eshqandaı jarylǵysh zat tabylǵan joq. Atalǵan derek boıynsha Qazaqstan Respýblıkasy Qylmystyq kodeksiniń 273-babyna sáıkes sotqa deıingi tergeý amaldary júrgizilýde», - dedi PD baspasóz qyzmeti.

Eske sala keteıik, Qazaqstanda terrorızm aktisi týraly kórineý jalǵan habarlaǵany úshin 5 myń aılyq eseptik kórsetkishke deıingi mólsherde aıyppul (14,5 mln teńge) nemese bas bostandyǵynan aıyrý túrinde jaza kózdelgen.

Vıdeodan alynǵan kadr