Qaraǵandyda jylý trassasyndaǵy apattyń aldyn ala sebebi aıtyldy

QARAǴANDY. QazAqparat – «Teplotranzıt» JShS basshylyǵy jer asty jylý qubyrynyń ne sebepti jarylyp ketkenin túsindirdi. Apat saldarynan Qaraǵandynyń 800-den astam kópqabatty úıge jylý berý azaıtyldy, dep habarlaıdy QazAqparat tilshisi.

Búgin saǵat 13: 00-de dıametri 800 mm M3 jylý magıstralinde jedel aýystyryp qosý kezinde sý beretin qubyrda jarylys boldy, saldarynan 5A pavılonyn sý basqan jáne Qaraǵandydaǵy 814 kóp qabatty úıge jylý berý azaıtyldy. «Teplotranzıt» JShS basshylyǵynyń aıtýynsha, jylý energııasyn óshirý júrgizilmegen.

«Qazir rezervtik magıstralǵa aýysý júrip jatyr jáne 3-4 saǵat ishinde jylý jáne temperatýralyq rejim qalpyna keltiriledi. Aqaýlardy joıý osy aýystyryp qosý barysynda júzege asyrylady», - dedi «Teplotranzıt» JShS tehnıkalyq dırektory Aleksandr Akıshın.

Kompanııa qyzmetkerleri apattardyń sıpatyn anyqtaı almaı otyr, sebebi jylý tasyǵyshtyń joǵary temperatýrasy men býlaný saldarynan qyzmetkerler tikeleı apat ornyna jaqyndaı almaýda. Ony qubyr tolyq bosatylǵannan keıin jáne jylý kamerasynan sýdy sorǵannan keıin ǵana ornatýǵa jáne joıýǵa kirisýge bolady.

«Qazir bizdiń mindetimiz - rezervtik jylý magıstraline aýysý jáne qalpyna keltirý gıdravlıkalyq temperatýralyq rejimi úshin qalanyń barlyq aýdandaryn aýystyrý. Sonan soń biz aqaýdy joıýǵa kirisemiz», - dedi Aleksandr Akınshın.

Jylý magıstraliniń kúrdeli bóligi 25 jyl buryn jóndelgen eken. Bıylǵy jyly kompanııa osy ýchaskeni «Nurly jol» baǵdarlamasy boıynsha qaıta qurýǵa berdi.

«Ázirge sebepterdi anyqtaý qıyn. Biraq biz jylý kamerasynda kompensator bolttary jatqanyn kórip otyrmyz. Jáne bul naqty turǵylyqty mekeni joq tulǵalar bolttardyń bóligin burap, sonyń saldarynan salnık kompensatory ashylyp ketýi múmkin degen kúdik bar. Bizde bul bolttardy urlap, metall qabyldaǵysh núktelerge tapsyrǵan jaǵdaılar da boldy», - dedi «Teplotranzıt» JShS tehnıkalyq dırektory.

Jedel aýysý kezinde 5A pavılonynda apat bolǵan orynǵa jaqyn jerde úsh qyzmetker: sheber jáne eki slesar bolǵan. Pavılondy ystyq sýmen basý nátıjesinde olar aıaq-qol jaraqattaryn aldy. Zardap shekkender dereý aýrýhanaǵa jatqyzyldy.

«H. J. Maqajanov atyndaǵy kópbeıindi aýrýhanaǵa 3 zardap shekken adam jetkizildi. Jaǵdaılaryna toqtalar bolsaq, 30 jastaǵy birinshi zardap shegýshi aýyr halde, 50% tereń kúıik alǵan. Ekinshi 46 jasar zardap shekken azamat 18% tereń kúıik jáne 27 jasar úshinshi zardap shekkendi 12% kúıik shalǵan», - dep habarlady Qaraǵandy oblysynyń Densaýlyq saqtaý basqarmasy.

«Teplotranzıt» JShS basshylyǵynyń aıtýynsha, zardap shekkenderdi emdeýge qajetti tólemaqyny saqtandyrý kompanııasy óteıtin bolady, óıtkeni osy kásiporyndardaǵy árbir qyzmetker saqtandyrylǵan. Sondaı-aq, «Teplotranzıt» tarapynan da kómek kórsetiledi.

Apatty joıý jáne úılerdi qalypty jylý rejimine qosýǵa keletin bolsaq, kompanııa 3-4 saǵat ishinde aqaýlardy joıýǵa ýáde berip, kóp qabatty úılerdiń turǵyndary keshke deıin jylý berýdi josparlap otyr.