Qaraǵandyda jumyssyzdar sý aıdynynda adamdardyń sýǵa batyp ketpeýin qadaǵalaıdy
«Jazda sý aıdyndaryndaǵy profılaktıkalyq jumysty báseńdetýge bolmaıdy. Adamdar demalǵysy keledi. Biraq sizder olarǵa qaı jerler qaýipti ekenin jetkizýlerińiz kerek. Shomylýǵa tyıym salý belgileri bizge kómektespeıdi. Jumyspen qamtý ortalyqtarymen aqyldasyp, jumyssyzdardy TJD qutqarýshylarymen jáne polıtsııamen birge profılaktıkalyq jumys júrgizýge tartý qajet», – dedi Ermaǵanbet Bólekpaev oblys ákimdiginde ótken jumys keńesinde.
Qaraǵandy oblysynda shomylý maýsymy bastalǵannan beri tórt adam, onyń ishinde bir bala qaza tapty.
«Bul qaıǵyly oqıǵalar Nura, Buqar jyraý, Abaı aýdandarynda jáne Qaraǵandynyń Fedorov sý qoımasynda boldy – bári shomylýǵa arnalmaǵan jerde batyp ketken. Ótken jylmen salystyrǵanda kórsetkish 50%-ǵa tómendegenimen arqany keńge salýǵa bolmaıdy. Qazirgi ýaqytta oblysta shomylýǵa tyıym salynǵan 240 oryn bar, olar eskertý belgilerimen jabdyqtalǵan. Bul sý aıdyndarynda patrýldeýdi kúsheıtý qajet», – deıdi Qaraǵandy oblysy TJD bastyǵy Murat Qatpanov.
Búgingi tańda óńirdiń sý aıdyndarynda 363 tyıym salý jáne eskertý belgisi ornatylǵan.
Alaıda demalýshylar olardy kóbine elemeıdi.
«Basqalarǵa sabaq bolý úshin quqyq buzýshylarǵa aıyppul salý kerek. Adamdar bizdiń eń aldymen olardyń qaýipsizdigine qatysty alańdaıtynymyzdy túsine bermeıdi. Sondaı-aq, jaǵajaıda sýǵa batqandarǵa alǵashqy kómek kórsetý boıynsha sheberlik sabaqtaryn ótkizý qajet. Bul jumysqa dárigerlerdi, «Qyzyl Jarty Aı» qoǵamdyq birlestiginiń eriktilerin tartqan jón. Sonymen qatar, kommýnaldyq jaǵajaılardy jaılastyrý jumysyn jedeldetý kerek. Qalqymalardy, qutqarý quraldaryna arnalǵan oryndardy ornatý qıyn emes. 10 kún ishinde nátıjeni kútemin», – dep atap ótti Ermaǵanbet Bólekpaev.