Qaraǵandyda jol salý kezinde 2 mlrd teńgeden astam qarajat urlandy
Qaraǵandy oblysynyń prokýratýrasy jol qurylysy salasy boıynsha tekserý júrgizdi. Nátıjesinde Qaraǵandy qalasynyń kóshelerin kúrdeli jóndeýge bólingen 2 mlrd teńgeden astam somaǵa bıýdjet qarajatyn urlaý faktileri anyqtaldy.
«Qaraǵandy oblysynyń prokýratýrasy «Qaraǵandy qalasynyń kommýnaldyq sharýashylyǵy, jolaýshylar kóligi jáne avtomobıl joldary bólimi» MM qyzmetinde avtomobıl joldarynyń sapasy máseleleri boıynsha tekserý júrgizdi. Tekserý nátıjesinde naqty oryndalmaǵan jumystarǵa oryndaldy dep, aktilerge qol qoıý faktileri anyqtaldy. Atap aıtqanda, Qaraǵandy qalasynyń Karl Marks jáne Magnıtogorsk kóshelerindegi avtojoldy kúrdeli jóndeý kezinde 2 mlrd teńgeden astam somadaǵy bıýdjet qarajaty jymqyrylǵan», - dep habarlady Qaraǵandy oblysy prokýratýrasynyń baspasóz qyzmeti.
Tekseris nátıjeleri boıynsha bólim basshylyǵyna qatysty QK-niń 189-baby 4-bóligi 2-tarmaǵymen «Memlekettik fýnktsııalardy oryndaýǵa ýákilettik berilgen adamnyń, oǵan teńestirilgen adamdardyń, laýazymdy adamnyń, eger olar óziniń qyzmettik jaǵdaıyn paıdalanýmen ushtasqan bolsa, asa iri mólsherde bóten múlikti ıemdenýi nemese ysyrap etýi» boıynsha sotqa deıingi tergep-tekserý bastaldy. Bul qylmystyq is qadaǵalaýshy vedomstvonyń baqylaýynda, qajetti tergeý áreketteri júrgizilýde.