Qaraǵandyda Jeńis kúni qarsańynda UOS ardagerleri men múgedekterine 80 myń teńgeden beriledi

QARAǴANDY. QazAqparat - Jeńis kúni qarsańynda Qaraǵandyda Uly Otan soǵysynyń ardagerleri men múgedekteri 80 myń teńge kólemindegi materıaldyq kómekke ıe bolady, dep habarlady qala ákimdiginiń baspasóz qyzmetinen.

«Qaraǵandy qalalyq máslıhat sessııasynyń qaýlysymen Jeńis kúni qarsańynda Uly Otan soǵysyna qatysýshylar men múgedekterine 80 myń teńge kóleminde birjolǵy materıaldyq kómek kórsetý belgilendi», - delingen habarlamada.

Qalalyq bılik ókilderiniń málimetinshe, búginde Qaraǵandyda Uly Otan soǵysynyń 214 ardageri men múgedegi ómir súredi.

«Soǵysqa qatysqandarǵa teńestirilgen qaraǵandylyqtarǵa (blokadashylar, tutqyndar, jaldanbalylar) 5 000 teńgeden tólenedi. Tyl eńbekkerleri men soǵysqa qatysýshylardyń jesir áıelderi 3 000 teńgeden alady», - dep qosty qala ákimdiginiń baspasóz qyzmetinde.

Jalpy Jeńis kúni qarsańynda materıaldyq kómek kórsetý úshin qalalyq bıýdjetten 44,5 mln. teńge bólindi.