Qaraǵandyda jekemenshik balabaqshada eki jasar balanyń tabany kúıip qalǵan

ASTANA. QazAqparat – Balabaqshada termııalyq kúıik alǵan bala týraly aqparat birneshe kún buryn jelide jarııalanǵan. Qaraǵandy oblysynyń polıtsııa departamenti osy oqıǵaǵa qatysty túsinik berdi, dep habarlaıdy QazAqparat ekaraganda.kz-ke silteme jasap.

«Bizdiń otbasymyzda qıyn jaǵdaı. Eki jasar ulymyz baratyn Oktıabrskaıa kóshesi, 125 meken-jaıynda ornalasqan «Kiddy land» jeke balabaqshasy qyzmetkerleriniń aıtýynsha, olar ulymyzdy jýyndyrmaq bolady. Sol kezde qaraýsyz qalǵan bala 2-3 dárejeli termııalyq kúıik alyp, denesiniń 4 paıyzy zaqymdanǵan. Ulym áli ońaltý satysynda. Biz kináliler jazasyn alýy úshin ádilettilikke qol jetkizýge tyrysamyz. Sondaı-aq, ata-analarǵa eskertý jasaǵymyz keledi. Beıtanys adamdarǵa balańyzdy senip tapsyrmas buryn óte muqııat bolyńyz», - dep jazady qala turǵyny áleýmettik jelide.

Sondaı-aq, fotosýretter men vıdeolardy qosa jarııalaıdy.

«Mektepke deıingi mekemede eki jasar balanyń kúıip qalý faktisi boıynsha QR Qylmystyq kodeksiniń 306-baby 1-bóligi (Jumystardy oryndaý ne tutynýshylardyń ómiri men densaýlyǵy qaýipsizdiginiń talaptaryna saı kelmeıtin qyzmetter kórsetý) boıynsha qylmystyq is qozǵaldy. Qazirgi ýaqytta tergeý sharalary júrgizilip jatyr», - dep habarlady Qaraǵandy oblystyq polıtsııa departamentiniń baspasóz qyzmetinen.

Al, oblystyq bilim basqarmasy atalǵan balabaqsha vedomstvo balansynda emestigin málimdegen.