Qaraǵandyda «Jasyl el» eńbek jasaǵynyń sarbazdary ekokrossqa qatysty

QARAǴANDY. QazAqparat – Qaraǵandy jastar resýrstyq ortalyǵynyń qyzmetkerleri «Jasyl el» eńbek jasaǵynyń sarbazdary úshin Green city atty ekokross uıymdastyrdy. Oǵan árqaısysy tórt adamnan turatyn Girls, Nike jáne «Akatsýkı» komandalary qatysty, dep habarlaıdy QazAqparat tilshisi.

«Ekokrosstyń maqsaty – qorshaǵan ortaǵa qamqorlyq jasaýdyń mańyzdylyǵyn eske salý», – dep atap ótti Qaraǵandy Jastar resýrstyq ortalyǵynyń jetekshisi Symbat Áýbakirova.

Green city úsh kezeńnen turdy. Birinshisinde komanda ataýy men uranyn oılap tabýy kerek edi.

Ekinshi kezeń ekologııalyq taqyrypta vıktorına túrinde ótti. Úshinshi týr jyldamdyqqa qoqys jınaý boldy.

Birinshi kezeńniń qorytyndysy boıynsha «Akatsýkı» komandasy jeńiske jetti.

Ekinshi týrda komandalarǵa 15 suraq qoıyldy. Vıktorınada upaı sany boıynsha 12 suraqqa jaýap bere otyryp, Girls kóshbasshy boldy.

Úshinshi týrda 10 mınýt boıy komandalar Máńgilik alaý aýmaǵynda qoqys jınady. Munda da Girls erekshelendi.

Ekokrossta birinshi oryndy Girls komandasy, «Akatsýkı» ekinshi, al Nike úshinshi orynǵa ıe boldy.

Ekokross jeńimpazdary dıplomdarmen marapattaldy.