Qaraǵandyda jasandy kógaldy qatty jel ushyryp áketti: jansaqtaý bólimindegi bala esin jıdy

QARAǴANDY. QazAqparat – Qaraǵandyda qatty jeldiń saldarynan jasandy kógalmen birge ushyp, bas jaraqatyn alyp, jansaqtaý bólimine túsken bala búgin esin jıdy. Dárigerler endi onyń ómirine esh qaýip joq dep otyr.

Eske salsaq, keshe qatty daýyl Kógildir toǵan yqsham aýdanyndaǵy úı aýlalarynyń birinde jasandy kógaldy ushyryp áketip, ústinde oınap otyrǵan eki bala jaraqat alǵan bolatyn. 8 jastaǵy balaqaıdyń bas jáne jaq súıekteri, qoly synǵan. Mıyna zaqym kelgen. Búgin oǵan operatsııa jasalady. Al 9 jastaǵy ekinshi balanyń jaǵdaıy qalypty. Ol klınıkalyq aýrýhanada em qabyldap jatyr. Dárigerler onyń ońalyp qalǵanyn aıtady.

«balany shok jaǵdaıynan shyǵardyq. Qazir kishkentaı naýqastyń jaǵdaıy jaqsardy. Esi anyq, sóılep jatyr. Neırohırýrgtar, synǵan mańdaı súıegin, tómengi jaq súıegin ornyna qoıady, joǵarǵy jaq súıegin de bekitedi. Travmatologtar da óz jumysyn isteıdi. Sondaı-aq balanyń oń qoly synǵan. Ony da qalpyna keltiredi», - dedi neırohırýrg-dáriger Ǵabıt Mahambaev.

Aıta keteıik, aýladaǵy bul jasandy kógaldy merdiger bir apta buryn ǵana ornatyp bastaǵan. Jumys áli aıaqtalmapty. Sondyqtan jıegi bekitilmegen. Al qaýipsizdik jaǵy nelikten eskerilmegendigin quzyrly organdar anyqtaıdy. Qazir atalǵan oqıǵa boıynsha qylmystyq kodekstiń 306 baby boıynsha is qozǵaldy.