Qaraǵandyda jas ofıtserler baly ótti

QARAǴANDY. QazAqparat – Vals yrǵaǵymen ásem hanymdar bı quıynynda kelbetti jigitterdiń súıemeldeýimen shyr aınaldy – Qaraǵandy oblysynda jas ofıtserlerdiń dástúrli baly ótti. Bı keshine 14 jup shaqyryldy, dep habarlaıdy QazAqparat tilshisi.

Bul «Ortalyq» jáne «Astana» óńirlik qolbasshylyqtarynyń, polıtsııa departamentiniń jáne basqa da kúsh qurylymdarynyń ofıtserleri.

Bıylǵy jyly bal Qazaqstan Respýblıkasy Qarýly Kúshteriniń 30 jyldyǵyna arnalǵan jáne Respýblıka kúnine oraılastyrylǵan.

«Іs-shara jas urpaqqa áskerı qyzmettiń kóp ǵasyrlyq tarıhy barysynda qalyptasqan estetıka men dástúrlerdi sińirýge baǵyttalǵan. Mundaı oqıǵa áskerı qyzmetshilerdiń birneshe býynyn biriktiredi: kadet synyptarynyń oqýshylary, kýrsanttar, ártúrli vedomstvolardyń áskerı qyzmetshileri jáne Qarýly Kúshterdiń ardagerleri», – dep atap ótti Qaraǵandy oblysynyń jastar resýrstyq ortalyǵynda.

Qatysýshylardy balǵa bir aı boıy kásibı horeograftar daıyndady. Saltanatty kıim kıgen jas ofıtserler men olardyń súıkimdi seriktesteri qonaqtarǵa klassıkalyq bı – polonez, Vena valsi, menýet, polkadan sheberlikterin kórsetti. Olardy quramyna horeograftar, teatr akterleri, Qalı Baıjanova kontserttik birlestiginiń ártisteri, djamp roýp jáne roýp skıppıng Federatsııasynyń ókilderi kiretin quzyretti qazylar alqasy baǵalady. Olar qatysýshylar arasynda oryndardy kelesi kórsetkishter boıynsha bóldi: yrǵaqtyq, sınhrondylyq, bıshilerdiń bir-birimen ózara árekettesýi, kórermenmen baılanys, rekvızıtterdi paıdalaný, ártistik.

Bas júldeniń ıegeri Maǵjan Qashenov pen Farızat Ashı boldy. Maǵjan B. Beısenov atyndaǵy ІІM Qaraǵandy akademııasynda eńbek etedi. Leıtenant krımınalıstıka kafedrasynda sabaq beredi. Al Farızat – akademııanyń kýrsanty, ol úshinshi kýrsta oqıdy.

«Farızat meniń jubaıym. Ol ekeýmiz eshqashan bı bılegen emespiz, sondyqtan biz Gran-prıge ıe bolǵanymyzǵa eki ese qýanyshtymyz. Meniń oıymsha, biz ártistik úshin tańdaldyq. Biz jeńiske jetý úshin kóp eńbek ettik. Polonez jáne klassıkalyq vals bıledik. Men uıymdastyrýshylar men akademııamyzdyń basshylyǵyna alǵysymdy bildiremin, óıtkeni qatysý úshin qarqyndy daıyndalýǵa týra keldi, keıde suranýǵa týra keldi. Bizge túsinistikpen qarap, jumys pen oqýdan bosatty», – dep bólisti Maǵjan Qashenov.

Sondaı-aq, qazylar alqasy birinshi, ekinshi jáne úshinshi oryn alǵan juptardy marapattady. Olarǵa músinsheler, dıplomdar men aqshalaı syılyqtar tabystaldy.