Qaraǵandyda jarylys bolǵan 16 qabatty úı tolyǵymen elektr qýatynan ajyratyldy
«Evakýatsııa tolyǵymen júrgizildi. Barlyq 126 páter turǵyndary evakýatsııalanady. Qazir oqıǵa ornynda jedel-tergeý toby, sarapshylar jumys istep jatyr. Kópqabatty úı tolyǵymen elektr qýatynan ajyratyldy. Biraq úıde jylý bar. Saraptama jumysyn aıaqtaǵannan keıin, biz adamdardyń úılerine oralýy máselesin oılastyramyz. Páterlerge oralǵysy keletinder qaıtyp oralady. Qazirgi ýaqytta 7 páterdiń turǵyndary ýnıversıtettiń jataqhanasyna ornalastyryldy. Adamdardyń bir bóligi jylytý pýnktinde – avtobýstar men kezekshi vahta kóligine ornalasty. Sondaı-aq, avtobýstarda ystyq tamaq uıymdastyryldy», - dedi Qaraǵandy qalasy ákiminiń mindetin atqarýshy Meıram Kojýhov.
Ol sondaı-aq irgeles páterlerdiń jaı-kúıi týraly túsindirdi.
Meıram Kojýhovtyń aıtýynsha, jarylys bolǵan páterden tómengi páterler zardap shekken. Biraq olar órtten emes, sýdan zardap shekti. Saraptama aıaqtalǵannan keıin bılik bul páterlerdi qalpyna keltirý máselesin sheshedi.
Eske sala keteıik, 10 qańtar kúni saǵat 21:29-da Qaraǵandy qalasynda Respýblıka dańǵyly, 18/2 boıynda órt shyqqany týraly habar kelip tústi. 16 qabatty bir kireberisti 127 páterli turǵyn úıdiń 8-shi qabatyndaǵy páterde jalpy alańy 30 sharshy metr aýmaq jandy.
1979 jyly týǵan er adam janyp jatqan páterdiń balkonynan qulap, medıtsınalyq mekemege jetkizildi.
Tekserý barysynda úsh adamnyń denesi tabyldy (boljam boıynsha eki er adam men áıel).
Sondaı-aq, Qaraǵandy oblysynyń TJD basshylyǵy gaz jarylysy rastalmaǵanyn habarlady. Oqıǵa ornynda gaz qurylǵylary tabylmaǵan.