Qaraǵandyda zańsyz salynyp jatqan turǵyn úı keshenderi súrilýi múmkin
Óńirlik kommýnıkatsııalar qyzmetiniń alańynda ótken brıfıngide Memlekettik sáýlet-qurylys baqylaý basqarmasynyń (MSQB) basshysy Serjan Aımaqov jaýapsyz qurylys salýshylar týraly aıtty.
«Barlyǵy salynyp jatqan 60-qa jýyq turǵyn úı jobasyn baqylaýǵa aldyq. Ótken jyldan beri júrgizilgen monıtorıng barysynda qurylys tártibi buzylǵan 20-dan astam turǵyn úı kesheni anyqtaldy. Zań boıynsha árbir qurylys salýshy qurylystyń bastalǵany týraly bizge habarlaýy kerek. Bul elektrondy úkimet veb-portaly arqyly onlaın rejıminde júzege asyrylady. Negizgi olqylyq saraptamalyq qorytyndynyń joqtyǵymen baılanysty», – dedi spıker.
Ol barlyq tártip buzýshylar ákimshilik jaýapkershilikke tartylyp, sot sheshimimen qurylys toqtatylǵanyn atap ótti. Basqarma basshysynyń aıtýynsha, 10-nan astam qurylys salýshy eskertpelerdi joıyp, habarlama jibergendikten, josyqsyz kompanııalar tiziminen shyǵarylǵan. Bul rette ruqsat qujattary joq 10 qurylys salýshy baqylaýda qalyp otyr.
«Aldaǵy ýaqytta olar qabyldaý aktisin ala almaıdy. Onyń ústine úılerdi buzý úshin sotqa júginýge bolady», – deıdi Serjan Aımaqov.
Sondaı-aq úleskerlerdi zańsyz tartqan 18 qurylys salýshy ákimshilik jaýapkershilikke tartyldy. Áleýetti satyp alýshylar yqtımal táýekelder týraly eskertilip jatyr.
Málim etilgendeı, keıbir kompanııalar qurylysty ýaqytsha toqtatý týraly sot sheshimin elemeıdi. Sol sebepti turaqty zań buzýshylarǵa qatysty prokýratýramen birlesip jospardan tys tekserý júrgizilgen. Onyń nátıjesimen uıǵarymdar berildi.
Serjan Aımaqov ruqsat etilmegen qurylys dep taný úshin ekonomıkalyq sotqa talap-aryz berilgen turǵyn úı keshenderin atady. Olar Al-Farabi turǵyn úı kesheni (qurylys salýshy «T-K Building» JShS), «Han» turǵyn úı kesheni (qurylys salýshy «TT-Invest» JShS), «Nura» turǵyn úı kesheni (qurylys salýshy «Satti lux» JShS).
Aıta keteıik, MSQB basqarmasynda senim telefony jumys isteıdi: (8-7212) 43-22-43. Sondaı-aq azamattardy apta saıyn jeke qabyldaý júrgiziledi.