Qaraǵandyda ulandyqtar jol apatynan zardap shekken adamdy aman alyp qaldy

QARAǴANDY. QazAqparat – Qaraǵandy oblysynda Ulttyq ulan sarbazdary jol apatyna túsken adamdy ólim aýzynan arashalap qaldy. Gvardııashylar jol shetinde aýdarylyp jatqan kóliktiń ishinen júrgizýshini alyp shyǵyp, dereý aýrýhanaǵa jetkizdi, dep habarlaıdy QazAqparat tilshisi.

13 maýsym kúni saǵat 17.30 shamasynda Qaraǵandy-Jezqazǵan baǵytynda marsh túzep bara jatqan Ulttyq ulan jaýyngerleriniń kolonnasy joldyń shetine shyǵyp ketken kólikti baıqaǵan. Apatqa ushyraǵan er adamnyń baqytyna oraı kolonnadaǵy sarbazdar arasynda medıtsına mamandary bolǵan. Olar oqıǵa ornyna toqtap, birden zardap shekkenderge kómek kórsetýge kirisken.

«Kolonna boıymen kele jatqan edik, kenet joldyń 530-shaqyrymy mańynda joldan shyǵyp, shuńqyrǵa túsip ketken kólikti baıqap, oılanbastan toqtadyq. Kolonnadan tez bólinip, alǵashqy kómek kórsetýge kiristik», - deıdi 5451 áskerı bóliminiń feldsheri Aıdarhan Jumamuratov.

Ulttyq ulan áskerı qyzmetshileri serjant Aıdarhan Jumamuratov, kishi serjant Marat Hudaıberdıev, qatardaǵy Amanjol Orynbasardyń jedel is-qımylynyń arqasynda apatqa ushyraǵan azamatqa alǵashqy medıtsınalyq kómek kórsetilip, ol der kezinde Jezqazǵan qalalyq aýrýhanasyna jetkizildi.