Qaraǵandyda turaqtandyrý qory azyq-túlik pen kókónisti arzan baǵada satyp jatyr

QARAǴANDY. QazAqparat – Qaraǵandyda turaqtandyrý qorynyń kókónisteri men bakaleıa ónimderi tómen baǵamen satylyp jatyr. Bul áleýmettik mańyzy bar ónimderdiń baǵasyn ustap turýǵa kómektesedi, dep habarlaıdy QazAqparat tilshisi.

Qazir turaqtandyrý qorynda 768 tonna bakaleıa ónimi bar: qaraqumyq jarmasy, kúrish, maı, sheker jáne un. Kókónis – 2600 tonna, olar – kartop, qyzylsha, sábiz, qyryqqabat jáne pııaz. Bul qor ónimderdiń maýsymdyq tapshylyǵy kezinde baǵanyń ósip ketpeýin qamtamasyz etedi.

«Kúzde biz qaraqumyq boıynsha ınterventsııa jasadyq. Ony bir kelisi 185 teńgeden satyldy. Sonymen qatar, kartopty 65 teńgeden shyǵardyq. Qazir qyryqqabattyń ınterventsııasyn jasap jatyrmyz. Onyń baǵasy - 83 teńge. Bul taýarlardy naryqtaǵy básekeni arttyrý jáne baǵanyń ósýine múmkindik bermeý úshin áleýmettik pavılondar arqyly taratamyz», - dedi «Saryarqa» ÁKK basqarma basshysy Marǵulan Káribekov.

Qaraǵandy oblysynyń ákimi Jeńis Qasymbek áleýmettik mańyzy bar ónimderdiń baǵasyn turaqtandyrý jumysyn kúsheıtip, naryqta taýar tapshylyǵy bolmaýyn baqylaýdy tapsyrdy.