Qaraǵandyda tórt memlekettiń aıtysker aqyndary baq synady

ORAL. QazAqparat - Qaraǵandy qalasynda Qaz daýysty Qazybek bıdiń 350 jyldyǵyna arnalǵan halyqaralyq aıtys ótti. Onda batysqazaqstandyq Jansaıa Mýsına júldeger atandy, dep habarlaıdy atalmysh óńirdegi «QazAqparat» tilshisi.

Aıtýly dodaǵa Qazaqstanmen qatar Qytaı, Mońǵolııa, Qyrǵyzstannan kelgen aqyndar da qatysyp, baq synady.

Belgili aqyn, Aıtys aqyndary men jyrshy-termeshilerdiń halyqaralyq odaǵynyń basqarma tóraǵasy Júrsin Erman júrgizgen aıtys qorytyndysynda qazylar alqasynyń sheshimimen qaraǵandylyq Amanjol Áltaev bas júldeni (3 mln teńge) jeńip aldy.

Qytaıdan kelgen Ularbek Mınathan - birinshi (1,5 mln teńge), qaraǵandylyq Dıdar Qamıev - ekinshi (1 mln teńge), batysqazaqstandyq Jansaıa Mýsına men qyzylordalyq Meıirbek Sultanhan úshinshi (750 myń teńge) orynǵa ıe boldy.

Aıtys barysynda Jansaıa Ularbekpen, sondaı-aq fınalda Arqalyqtan kelgen Aıbek Qalıevpen synǵa tústi.

Eske sala keteıik, J.Mýsına «Qazaqstandaǵy 100 jańa esim» jobasy tizimine engizilgen bolatyn. 

QazAqparat buǵan deıin habarlaǵandaı, senbi kúni Qaz daýysty Qazybek bı Keldibekulynyń 350 jyldyǵyna arnalǵan mereıtoılyq is-shara ótti. Oǵan Qazaqstan Respýblıkasynyń Memlekettik hatshysy Gúlshara Ábdiqalyqova qatysty.

Saltanatty shara qazaqtyń uly bıiniń týǵan jeri - Qarqaraly aýdany Egindibulaq aýlynda ótti.

Oǵan Parlament depýtattary, memlekettik organdar jetekshileri, qoǵam qaıratkerleri, belgili ǵalymdar men shyǵarmashylyq zııaly qaýym ókilderi qatysty.