Qaraǵandyda Táýelsizdik kúni dúnıege kelgen 117 sábı «Súıinshi» syılyǵyn aldy

QARAǴANDY. QazAqparat - Qaraǵandy oblysynda 16 jáne 17 jeltoqsanda týylǵan 117 bala el Táýelsizdiginiń 30 jyldyǵyna oraı Memleket basshysynyń atynan «Súıinshi» baby-boksyn aldy. Al olardyń ata-analaryna quttyqtaý haty tabystaldy, dep habarlaıdy QazAqparat tilshisi.

«Súıinshi» syılyq jıyntyǵyna «Táýelsiz Qazaqstanǵa 30 jyl» estelik monetasy, týý týraly kýálik, sábılerge arnalǵan birinshi qajettiliktegi taýarlar, sondaı-aq el Prezıdenti Qasym-Jomart Toqaevtyń quttyqtaý ashyqhaty kiredi. Keıbir bosanǵan áıelderdi perzenthanada quttyqtap, qalǵandaryna syılyqty úıine jetkizip beremiz», - dedi «Azamattarǵa arnalǵan úkimet» memlekettik korporatsııasy Qaraǵandy oblysy boıynsha fılıaly baspasóz qyzmetiniń jetekshisi Qýanysh Seıithanov.

Lılııa men Roman Bespalovtar alǵashqylardyń biri bolyp «Súıinshi» ıegeri atandy. 16 jeltoqsanda olardyń tuńǵyshy Mıron dúnıege keldi.

«Kúıeýim ekeýmiz ulymyzdy kúttik, onyń dúnıege kelýin taǵatsyzdana kútip, daıyndaldyq. Búgin biz Mıronnyń alǵashqy qujaty – onyń týý týraly kýáligi jáne Memleket basshysynyń quttyqtaý hatyn aldyq. Bul óte jaqsy», – deıdi Lılııa Bespalova.

Aıjan Toqbergenova men Bekzat Sqaqov besinshi balanyń ata-anasy atandy.

Azamattarǵa arnalǵan úkimet pen «Qazposhta» qyzmetkerleri kópbalaly otbasyn úıine baryp quttyqtady.

«Bizdiń otbasymyz úlken, Ernar - besinshi balamyz. Biraq basqa balalarymyzdan kem súımeımiz. Ol Táýelsizdik kúni dúnıege keldi. Bul - árbir qazaqstandyq úshin óte mańyzdy oqıǵa. Ernar óz eliniń laıyqty uly bolady dep úmittenemiz», – deıdi Aıjan Toqbergenova.