Qaraǵandyda «Tarıhtyń únsiz kýágerleri» kórmesi ashyldy

ASTANA. QazAqparat - Búgin oblystyq tarıhı-ólketaný murajaıynda «Qaraǵandy oblysynyń murajaılar aptasy» sharasynyń sheńberinde Jezqazǵan tarıhı-ólketaný murajaıynyń kórmesi ashyldy. Ekspozıtsııa «Tarıhtyń únsiz kýágerleri» dep atalady. 

Munda murajaıdyń ashylýynan bastap 1978-shi jyldan beri jınalǵan eń qymbat jádigerleri qoıylǵan, dep habarlaıdy óńir ákimdiginiń resmı saıty .  

Kórmede Ulytaý-Jezqazǵan aımaǵynyń tarıhymen tanysýǵa bolady. jádigerleri bar stendter kelesi taqyryptar boıynsha bólingen: «Saryarqanyń kóne joldary», «Eskertkishter - tarıhtyń únsiz kýágerleri», «Ýaqyt úndestigi».

- Bizdiń murajaı 1978-shi jyly qurylǵan. Búgingi kúni onda 50 myńnan astam jádiger bar. Olardyń ishinde sırek kezdesetin dúnıeler de tabylady. Bul kórmege biz 70 jádiger alyp keldik. Olardyń barlyǵy - túpnusqa. Bıylǵy jyly bizde «Tarıhta óz atyńdy qaldyr» degen aktsııa ótti. Ol aktsııa sheńberinde Taıjan Qalmaǵambetovtyń urpaqtary bizdiń murajaıǵa onyń syrnaıyn qaldyrǵan edi. Ony da osynda alyp keldik, - deıdi Jezqazǵan tarıhı-arheologııalyq murajaıynyń dırektory Raýshan Qapparova.

Kórmege kelýshiler bylǵarydan, qazaq halqynyń aǵash pen metaldan jasalǵan ydystaryn, qymyz saqtaýǵa arnalǵan qumyra, bıe sútin quıatyn bylǵary ydysty, keselerge arnalǵan qutylar, erlerdiń beldikteri, áıelderdiń áshekeılerin kóre alady.

Jezqazǵan tarıhı-arheologııalyq murajaıynyń kórmesi 17-shi shildege deıin jalǵasady.