Qaraǵandyda tarıhı kerýen uıymdastyryldy

QARAǴANDY. QazAqparat - Qaraǵandy oblystyq tarıhı-ólketaný murajaıy «Qaraǵandynyń áskerı jáne eńbek dańqy izimen» atty patrıottyq aktsııasyn bastady. Sharaǵa kadetter qatysty. Murajaı qyzmetkerleri tarıhı oryndarǵa ekskýrsııa jasady, dep habarlaıdy oblystyq ákimdiktiń baspasóz qyzmeti.

Uıymdastyrýshylar aktsııany Qaraǵandynyń 85 jyldyǵyna, Uly Jeńis kúnine jáne Keńes Odaǵynyń batyrlary Núrken Ábdirov pen Qazbek Nurjanovtyń 100 jyldyǵyna arnaǵan. Onyń maqsaty - jas urpaqqa Ekinshi dúnıejúzilik soǵys kezinde qaraǵandylyqtardyń erligin kórsetý.

Kadetter qaraǵandylyq jaýyngerlerdi maıdanǵa shyǵaryp salý rásiminiń teatrlandyrylǵan qoıylymyn tamashalady. Aktsııa qatysýshylary soǵysta qaza tapqandardy bir mınýt únsizdikpen eske aldy. Sonymen qatar murajaı aldyndaǵy alańda evakogospıtal ınstallıatsııasy ornatyldy.

Ekskýrsııa kezinde jasóspirimder soǵys kezinde evakogospıtal ornalasqan ǵımarattardy aralap qaıtty. Olarǵa Qaraǵandylyq 77-shi artıllerııalyq polki maıdanǵa attanǵan jer - burynǵy "Oktıabr" kınoteatry (qazir "Shalqyma" kontsert zaly) kórsetildi. Sondaı-aq shara barysynda kerýen qatysýshylary evakogospıtaldarda qaıtys bolǵan sarbazdardyń baýyrlas zıratyna jáne "Máńgilik alaý" memorıalyna gúl shoqtaryn qoıdy.

Resmı derekter boıynsha, Qaraǵandy oblysynan maıdanǵa 59935 adam attanǵan, onyń 34352-i Otanyna qaıtyp oralyp, 25583-i qaza bolǵan, al 9399-i habar-osharsyz ketken. 6587 qaraǵandylyq erligi úshin ordendermen jáne medaldarmen marapattaldy.

1941 jyldyń sońynda Qaraǵandy oblystyq densaýlyq saqtaý bólimi batys aýdandarynan kelgen jaralanǵandardy ornalastyrý úshin 6 gospıtal uıymdastyrdy. Ol úshin eń jaqsy ǵımarattar: feldsherlik-akýsherlik mektep, muǵalimder ınstıtýty, qalalyq partııa komıteti, "Qaraǵandykómir", "Shahtostroı" kombınattary, "Suryptaý" temir jol stantsııasynyń klýby beıimdelgen.