Qaraǵandyda taksı júrgizýshisin óltirdi degen kúdikpen er adam ustaldy

ASTANA. QazAqparat - Qaraǵandyda taksı júrgizýshisin óltirdi dep kúdikke ilingen adam táýlik ishinde ustaldy, – dep habarlaıdy QazAqparat Polisia.kz-ke silteme jasap.

27 qazan kúni saǵat 17.00 shamasynda Qaraǵandy qalalyq Polıtsııa basqarmasyna qarasty Kırov polıtsııa bólimine Ýchıtelskaıa kóshesinde birneshe pyshaq jaraqaty bar 59 jastaǵy azamattyń máıiti tabylǵandyǵy týraly habarlama tústi.

Oqıǵa ornyna oblystyq Polıtsııa departamenti jáne qalalyq Polıtsııa basqarmasynyń jedel-tergeý toptary jiberildi. Polıtsııa qyzmetkerleri jábirlenýshiniń taksı júrgizýshisi bolyp jumys isteıtinin anyqtady.

Atalǵan fakti boıynsha Qazaqstan Respýblıkasy Qylmystyq kodeksiniń 99-baby 1-bóligine sáıkes qylmystyq is qozǵaldy. Krımınaldyq polıtsııa qyzmetkerleri júrgizgen jedel-izdestirý jáne arnaıy is-sharalary barysynda asa aýyr qylmys jasady degen kúdikpen 25 jastaǵy qala turǵyny ustaldy.

Ol júrgizýshige jol aqysyna kelispeýshilik barysynda pyshaq jaraqatyn salǵanyn moıyndady.

Keıin kúdikti taksıdi aıdap ketip, JBI yqsham aýdanyna barar joldaǵy temirjol ótpesiniń janyna tastap ketken. Qylmys qarýy – pyshaq tárkilendi. Kúdikti ýaqytsha ustaý ızolıatoryna qamaldy. Tergeý amaldary júrgizilýde.