Qaraǵandyda taǵy bir eldi meken «Aýyl - el besigi» baǵdarlamasyna qosylmaq
Qaınar aýylynda qazirgi tańda 1300 adam turady. Jyl saıyn turǵyndar sany artyp keledi. Atalmysh eldi meken áleýeti zor aýyldar qataryna jatady. Munda jas mamandar men basqa da aýdandardyń turǵyndary kóship kelýde. Olardyń basym bóligi «Qaınar» sharýa qojalyǵynda jumys isteıdi. Sharýashylyq áýlıekól asyl tuqymdy buqalardy ósirýmen aınalysady. «Qaınar» JShS basshysy Seıtjapar Nyǵmetov kásiporyn aýyl turǵyndarynyń turmystyq jaǵdaıyn jaqsartýǵa da qolǵabys etetinin aıtady.
«Jaqynda bizdiń aýylǵa Shet aýdanynan 12 balasy bar otbasy kóship keldi. Jalpy eseptegende aýylymyzda 15 kópbalaly januıa turady. Osyndaı otbasylardaǵy analar jumys isteı alýy úshin 90 oryndyq balabaqsha ashtyq», - deıdi Seıtjapar Nyǵmetov.
Kásipker aýyldy kórkeıtýge jáne damytýǵa úlken úles qosýda. Sonymen qatar áleýmettik baǵdarlamalarǵa da belsendi qatysady. Oblys ákimi muny «Rýhanı jańǵyrýdyń» naǵyz úlgisi ekenin atap ótti.
«Eger turǵyndar sany ósip, jas mamandar osy jerge umtylsa, onda sizdiń aýylyńyzdy «Aýyl - el besigi» baǵdarlamasyna qosýǵa bolady. Biz mundaı múmkindikti qarastyramyz. Bul baǵdarlama Elbasynyń tapsyrmasy boıynsha áleýetti aýyldardy damytý úshin ázirlengen», - dedi Erlan Qoshanov.
Bıylǵy jyly Qaraǵandy oblysynda «Aýyl - el besigi» baǵdarlamasy úsh eldi mekende - Nura, Ulytaý jáne Atasýda iske asyrylady. Joba aıasynda aýyl men kentterge turǵyn úıler salýǵa, joldardy jóndeýge jáne eldi mekendi damytýǵa qarjy beriledi.
Jumys sapary barysynda aımaq basshysy Nura aýdanynda egis naýqanynyń qalaı júrgizilip jatqany týraly da saýaldar qoıdy. «Qaınar» JShS bas agronomy Aınar Nyǵmetov egis jumystary merziminde aıaqtalatynyn aıtty. Ol sondaı-aq, bıylǵy jyly kásiporynda taǵy bir, toǵyzynshy egis kesheni iske qosylǵanyn aıtty. «Qaınar» avtoparkinde 300 traktor jumys isteıtini týraly málimdeldi. Al astyqty saqtaý úshin munda jańa zamanaýı qoıma salynady.
Qoıma 5000 tonna daqyl saqtaýǵa shaqtalǵan. Sharýa qojalyǵy barlyq qurylys jumystaryn egin jınaýǵa deıin aıaqtaýdy josparlap otyr. Nysannyń jalpy quny 250 mıllıon teńgeni quramaq.
«Buryn bizde óz qoımamyz bolǵan joq, sondyqtan ónimdi birden jáne arzan baǵamen satýǵa týra keldi. Jańa astyq qoımasynda barlyǵy avtomattandyrylady. Biz reseılik astyq tazalaý mashınasyn satyp aldyq. Ol bir saǵat ishinde 40 tonnaǵa deıin astyq tazalaı alady, sondaı-aq tazalaý eki márte ótkiziledi», - dep túsindirdi «Qaınar» JShS dırektory Seıtjapar Nyǵmetov.
Qazaqstan Respýblıkasynyń Tuńǵysh Prezıdenti - Elbasy Nursultan Nazarbaev óz úndeýlerinde memleketimizdiń damýyndaǵy aýyldyń mańyzdy rólin birneshe ret atap ótti. Shalǵaıdaǵy aýdandar men aýyldardy qoldaý úshin Nur Otan partııasy «Aýyl - El besigi» jobasyn áirledi.
Aýyllar ósý jáne turaqty damý núktelerine aınalýy tıis. «Aýyl - El besigi» arnaıy jobasy aıasynda eldegi 1500 áleýetti eldi meken anyqtalady. Jyl saıyn olardy damytýǵa 30 mlrd teńgeden bólinetin bolady. Qarajat aýyldarda ınjenerlik-kommýnıkatsııalyq ınfraqurylymdy, áleýmettik nysandardy damytýǵa baǵyttalady. Sondaı-aq, baǵdarlama onda shaǵyn óndirister men aýyl sharýashylyǵy ónimderin qaıta óńdeý kásiporyndaryn damytýǵa múmkindik beredi.