Qaraǵandyda «Rýhanı jańǵyrý» baǵdarlamasyn júzege asyrý jaıy onlaın talqylandy
Zoom formatynda uıymdastyrylǵan keńeske oblys ákiminiń shtattan tys keńesshisi Bekzat Altynbekov, oblystyq ishki saıasat basqarmasynyń basshysy Erlan Qusaıyn, «Rýhanı jańǵyrý» jobalyq keńsesiniń basshysy Aıtbaı Jumaǵulov, tarıh ǵylymdarynyń kandıdaty Nursahan Beısembekova, Saryarqa Aqparat JShS dırektory Qambar Ahmetov, oblysymyzdyń barlyq qala, aýdan ákimderiniń orynbasarlary, oblystyq basqarma basshylary, joǵary oqý oryndary prorektorlary qatysty.
– Aqpan aıynda oblys ákiminiń qatysýymen ótken jınalysta «Rýhanı jańǵyrý» jobalyq keńsesiniń jumysyn kúsheıtý, baǵdarlamany jan-jaqty júzege asyrý jaıynda tapsyrmalar berilgen bolatyn. Biz búgin sol máselelerdiń qalaı sheshilip jatqanyn qarastyryp, aldaǵy josparlardy talqylaımyz, — degen A.Núkenov baǵdarlama aıasyndaǵy jumystardyń mańyzdylyǵyna toqtalyp ótti.
Eldegi tótenshe jaǵdaı sharalaryna baılanysty biraz jospardy shegerýge týra kelgenimen, «Rýhanı jańǵyrý» baǵdarlamasy ıdeologııalyq jumystyń negizgi baǵyty retinde karantın ýaqytynda nazardan tys qalmaýy kerektigin atap aıtty.
Budan ári sóz alǵan oblystyq ishki saıasat basqarmasynyń basshysy Erlan Qusaıyn 2019 jylǵy jumystyń nátıjesine taldaý jasap, aldaǵy ýaqytta nazarǵa alynýǵa tıis máseleler týraly aıtty. Baǵdarlama jumysyn qarqyndatý úshin tyń ıdeıa, jańa jobalar, jalpy jumystyń jańa formatyn izdeý qajettigin alǵa tartty.
Aıta ketý kerek, qazir oblysta bul baǵytta birqatar jumystar qolǵa alynǵan. Oblys ákiminiń «Rýhanı jańǵyrý» baǵdarlamasy boıynsha shtattan tys keńesshisi bolyp Bekzat Altynbekov bekitildi jáne oblystyq jobalyq keńseniń basshylyǵyna Aıtbaı Jumaǵulov taǵaıyndaldy. Jobalyq keńse «Saryarq aqparat» medıaholdıngi quramyna engizilip, keńse jumysynda mazmundyq ózgerister boldy. Qazirgi kúni shtattyq qurylymy naqtylanyp, kadrlyq quram tolyqtyrylý ústinde.
Kelesi kezekte sóz alǵan jobalyq keńse basshysy Aıtbaı Jumaǵulov jyl basynan beri júzege asyrylyp jatqan jáne aldaǵy ýaqytta iske qosylatyn jobalarmen tanystyrdy.
— Álemdik pandemııa biraz josparlarymyzdy tejedi. Barlyq is-sharalar, óńirlerdegi jobalar karantın ýaqyty bitken soń qarqyndy júzege asyryla bastaıdy», — degen ol keı aýdandarda kúni búginge deıin baǵdarlamaǵa jetkilikti deńgeıde mán berilmeı kele jatqanyn málimdedi.
Óz kezeginde oblys ákiminiń orynbasary Abzal Núkenov barlyq aýdan-qalalar baǵdarlamanyń oryndalýyna belsendi qatysýy qajet ekenin atap aıtty. Ásirese, byltyr tómen nátıje kórsetken aýdandar belsendi jumys isteýi kerek. Ári buǵan tótenshe jaǵdaı men karantın kedergi keltirmeýi tıis.
«Rýhanı jańǵyrý» baǵytyndaǵy jumystaryńyzdy saraptap, oblystyq jobalyq keńsemen birlese otyryp, jumysty jandandyryńyzdar! Karantın sebep emes! Kerisinshe osy ýaqytta tyń ıdeıalar usynyp, baǵdarlamanyń naǵyz halyqtyq mánin ashyp, jumys isteýlerińiz kerek, — dedi Abzal Núkenov.
Keńes jumysyna qatysýshylar ult rýhanııatynyń shynaıy janashyry ári naqty qoldaýshysy Bekzat Altynbekovtiń oralymdy oılary men ornyqty pikirlerine de qyzyǵa qulaq túrdi.
Budan bólek, jıyn barysynda «Tulǵataný» ǵylymı-zertteý ortalyǵynyń dırektory Nursahan Beısenbekova baǵdarlamaǵa arnalǵan ádistemelik nusqaýlyqpen tanystyrdy.
A.Núkenov ǵalym bul nusqaýlyqty barlyq aýdan, qalalar, basqarma basshylary, ásirese bilim berý mekemeleri, kolledj, joǵary oqý oryndar, mádenıet mekemeleri óz jumystarynda basshylyqqa alýy qajettigin atap aıtty.
Sonymen qatar, jıyn barysynda Mádenıet, arhıv jáne qujattama basqarmasy basshysy Erkebulan Jumekenov oblysta «Qazaqstannyń kıeli geografııasy», «Dala folklory men mýzykasynyń 1000 jyly», «Uly dala esimderi. Qaraǵandy oblysynyń kórnekti tulǵalary» jáne basqa da mańyzdy jobalardyń aıasynda atqarylǵan jumystardy baıandady. «Aýyl – el besigi» baǵdarlamasynyń qalaı júzege asyp jatqany týraly Ekonomıka basqarmasy basshysynyń orynbasary Gúlmıra Ábisheva aıtyp berdi.
Onlaın keńes túıininde oblys ákiminiń orynbasary kún tártibindegi másele boıynsha aldaǵy kezeńde atqarylýy tıis jumystardyń jobasyn saralap, salalyq baǵyttarǵa jaýapty memlekettik mekemelerdiń mindetterin taǵy bir márte naqtylap ótti.