Qaraǵandyda «Rýhanı jańǵyrý» aıasynda 479 joba júzege asyrylady

QARAǴANDY. QazAqparat - Qaraǵandy oblysynyń ákimi Erlan Qoshanov óziniń eseptik kezdesýinde óńirde «Rýhanı jańǵyrý» baǵdarlamasynyń qalaı júzege asyrylyp jatqanyn aıtty. Mysal retinde ol qarapaıym qaraǵandylyqtardyń jasap jatqan ıgi isterin keltirdi, dep habarlaıdy QazAqparat.

Erlan Qoshanov Aleksandr Korogodovty atap ótti, onyń esimi qaraǵandylyqtarǵa sportshy Habıb Nýrmagomedovty shaqyrǵannan keıin belgili boldy. Aleksandr balalar úıinde volonter, bos ýaqytynda kelip, tárbıelenýshilermen aralasady. 2018 jyly qysta ol aralas jekpe-jek palýany Habıb Nýrmagamedovty Qaraǵandyǵa kelip, balalarmen kezdesýge shaqyrǵan. Sportshy qaraǵandylyqtyń shaqyrýynan bas tartpaı, osy jyldyń 27 qańtarynda oblys ortalyǵyndaǵy balalar úıine kelip qaıtqan.

Taǵy bir mysal - aǵylshyn tiliniń oqytýshysy Erlan Rahymov. Ol óz kýrstarynda kópbalaly jáne az qamtylǵan otbasylarynyń balalaryn tegin oqytady.

Sonymen qatar oblys ákimi Maqajanova atyndaǵy klınıka dırektory Dáýir Qurmanǵalıev týraly da toqtala ketti. Ol naýqas qyz balanyń ómirin saqtap qalý úshin úshin oǵan ýaqytsha qamqorlyq rásimdegen. Sonymen qatar qazaq tiliniń jeksenbilik klýbynyń negizin qalaýshy Natalıa Ternovaıa týraly da aıtyp ótti.

«Osyndaı jerlesterimizdi maqtan tutamyz. Osy mysaldar bizdi shabyttandyratyn jáne nege umtylý kerektigin kórsetetin adamdardyń az ǵana bóligin kórsetedi. Bul ulttyń rýhanı damýy», - dedi Erlan Qoshanov.

«Rýhanı jańǵyrý» baǵdarlamasy aıasynda óńirde 2022 jylǵa deıin 479 jobany júzege asyrý josparlanýda.