Qaraǵandyda respýblıkalyq poezııa baıqaýynyń jeńimpazdary anyqtaldy

QARAǴANDY. QazAqparat – Qaraǵandyda jyl saıynǵy «Dúnıege keler áli talaı Qasym» respýblıkalyq múshaıranyń qorytyndysy shyǵaryldy. Bıyl ol Qazaqstan Táýelsizdiginiń 30 jyldyǵyna jáne Qasym Amanjolovtyń 110 jyldyǵyna arnaldy, dep habarlaıdy QazAqparat tilshisi.

Baıqaýdyń uıymdastyrýshylary Qaraǵandy oblysynyń ákimdigi men Tilderdi damytý basqarmasy bolyp tabylady.

«Baıqaý alǵash ret oblystyq deńgeıde 2016-2017 jyldary uıymdastyryldy.

2018 jyldan bastap «Rýhanı jańǵyrý» baǵdarlamasy aıasynda respýblıkalyq aýqymda ótkizilýde. Bıyl baıqaýǵa 92 adam qatysty», – dep habarlady tilderdi damytý basqarmasynan.

Qatysýshylardyń jasy 18-den 45 jasqa deıin. Olar úsh óleń: Qasym Amanjolovqa arnalǵan óz óleńin, Táýelsizdik kúni, sondaı-aq erkin taqyrypta óleńder oqydy.

Baıqaý qorytyndysy boıynsha bas júldeni Nur-Sultan qalasynan Ǵylymnur Kádirbaı jeńip aldy. Birinshi oryndy Almaty oblysynan kelgen Ásel Ospan, ekinshi oryndy Nur-Sultan qalasynan kelgen Mıras Asan jáne Aqtóbe oblysynan kelgen Dáýren Tileýhan ózara bólisti. Úshinshi orynǵa Aızada Rahymjanova (Nur-Sultan q.), Eseı Jeńisuly (Almaty q.) jáne Asyl Sultanǵazy (Almaty oblysy) ıe boldy.

Ataýly syılyqtar bes adamǵa berildi, onyń ishinde Qaraǵandy oblysynyń eki turǵyny – Erik Naryn (Kárim Saýǵabaı atyndaǵy syılyq) jáne Abaı Oraz (Saılaýhan Nakenov atyndaǵy syılyq) boldy.

Baıqaýdyń jeńimpazdary men júldegerlerine dıplomdar men aqshalaı sertıfıkattar, sondaı-aq akademık E.A. Bóketov atyndaǵy Qaraǵandy ýnıversıteti shyǵarǵan «Qasym taǵylymy» eki tomdyǵy jáne Qasym Amanjolovtyń sózine jazylǵan «Qasymnyń ánderi-aı» ánder jınaǵy (dısk) tabys etildi.