Qaraǵandyda oıyn alańynda eki bala zardap shekti: ákimniń orynbasary qyzmetinen ketti

QARAǴANDY. QazAqparat - Qaraǵandy oblysynyń ákimi Ermaǵanbet Bólekpaev eki bala zardap shekken balalar oıyn alańyndaǵy tótenshe jaǵdaıǵa baılanysty tapsyrma berdi. Álıhan Bókeıhan aýdany ákiminiń aýlalardy abattandyrýǵa jaýapty orynbasary jumystan shyǵarylady, dep habarlaıjy QazAqparat tilshisi.

Qalada qaýipsizdikti kúsheıtý úshin abattandyrý erejelerin qaıta qaraý kerektigi aıtyldy.

«Ótken aptada bizde tótenshe jaǵdaı oryn aldy. Eresekterdiń nemquraılylyǵynan eki bala zardap shekti. Men barlyǵyna birneshe ret eskerttim jáne taǵy da qaıtalaımyn: oıyn alańdaryn jóndegende eń aldymen qaýipsizdik týraly oılanyńyzdar! Fýtbol qaqpalary men sáýlet nysandaryn tekserip, nyǵaıtyńyzdar, eshteńe qulap jatpaýy kerek! Merdigerler asyǵystyq tanytyp, tezirek aqsha tapqysy keledi, al keıbir áriptesterimiz buǵan kóz juma qaraıdy», - dedi Ermaǵanbet Bólekpaev apparattyq keńeste.

Ol qala ákimine Álıhan Bókeıhan aýdany ákiminiń orynbasaryn jumystan shyǵarýdy tapsyrdy. Sondaı-aq quqyq qorǵaý organdaryna merdigerdiń jaýapkershiligine quqyqtyq baǵa berýdi surady.

«Mundaı nárselerge budan bylaı jol berýge bolmaıdy. Abattandyrý erejelerin qaýipsizdikti arttyrý baǵytynda qaıta qaraýdy tapsyramyn. Mysaly, nege jasandy kógaldyń ornyna tartan jabynyn qoldanbasqa. Munyń bárin zertteý kerek, ózgerister engizý kerek. Bizdiń maqsatymyz – qaýipsiz balalyq shaqty qamtamasyz etý. Bul máselelerdi qysqa merzimde sheshý qajet», - dep atap ótti óńir basshysy.