Qaraǵandyda órt sóndirý-qutqarý sporty boıynsha álem chempıonaty ótip jatyr
Halyqaralyq jarystardyń ashylýy «Shahter» stadıonynda sanıtarlyq-karantındik talaptardy saqtaı otyryp, kórermendersiz ótýde, dep habarlaıdy QazAqparat tilshisi.
Sport merekesi Jambyl oblysynda jarylys kezinde qaza tapqandardy bir mınýt únsizdikpen eske alýmen bastaldy.
Kenshiler qalasy osyndaı jarystar ótkiziletin Qazaqstannyń ekinshi qalasy boldy. Sharany Órt sóndirýshiler men qutqarýshylardyń halyqaralyq sport federatsııasy jáne QR Tótenshe jaǵdaılar mınıstrligi birlesip uıymdastyrdy.
Chempıonatqa álemniń 10 elinen 10 erler jáne 5 áıelder komandasy qatysýda. Olar: Qazaqstan, Reseı, Belarýs, Slovakııa, Polsha, Senegal, Chehııa, Ózbekstan, Mońǵolııa jáne Avstrııa.
Jarystyń ashylý rásimine Reseı Federatsııasynyń Azamattyq qorǵanys, tótenshe jaǵdaılar jáne tabıǵı apattardyń saldaryn joıý mınıstriniń birinshi orynbasary Aleksandr Chýprııan, Halyqaralyq órt sóndirýshiler men qutqarýshylar sport federatsııasynyń prezıdenti, Belarýs Respýblıkasynyń Tótenshe jaǵdaılar mınıstri Vadım Sınıavskıı keldi.
QR TJ mınıstri ıÝrıı Ilınniń aıtýynsha, Qaraǵandy kezdeısoq tańdalmaǵan. Yńǵaıly logıstıkaǵa jáne standarttarǵa sáıkes stadıonnyń bolýy tańdaýǵa áser etti. Ashyq aýada jarystar ótkizý úshin oryn qajet boldy.
Stadıonda jarystar ótkizý úshin qajetti baza daıyndaldy. Qatysýshylarǵa yńǵaıly bolý úshin kıim sheshetin shatyrlar, fýdkort ornatyldy. Ulttyq salt-dástúrlermen tanysý úshin etnoaýyl salyndy.
Chempıonattyń ashylýy aıasynda apattyq-qutqarý tehnıkasy men jabdyqtarynyń kórmesi ótti. Onda otandyq ónimder de usynyldy.
Chempıonat kelesi báseke túrlerin qamtıdy: oqý munarasynyń tórtinshi qabatynyń terezesine shabýyl satysymen kóterilý, 100 metrlik kedergiler jolaǵynan ótý, jaýyngerlik qanat jaıý jáne 100 metrden 4 órt estafetasy. Sportshylarda dopıngke qarsy synamalardyń tártibi bar.
Ár túr boıynsha jeńimpazdar anyqtalady. Mysaly, «Oqý munarasynyń tórtinshi qabatyna shabýyl satysymen kóterilý» túri boıynsha erler men áıelder arasynda fınalda avtokólikter oınatylady.
Jarystyń jabylý saltanaty men marapattaý rásimi 5 qyrkúıekte ótedi.