Qaraǵandyda oqýshy ólimine qatysty tergeý júrip jatyr

ASTANA. QazAqparat – Qaraǵandyda ystyǵy kóterilip qaıtys bolǵan oqýshy ólimine qatysty tergep-tekserý amaldary júrip jatyr. Bul týraly QR Densaýlyq saqtaý vıtse-mınıstri Aıjan Esmaǵambetova málim etti, dep habarlaıdy QazAqparat tilshisi.

«Qaraǵandydaǵy jaǵdaı boıynsha aldymen balanyń ata-anasyna kóńil aıtamyn. Oqýshy óliminiń sebebi ázirge belgisiz, tergeý amaldary júrip jatyr. Sot-medıtsınalyq saraptamanyń alǵashqy qorytyndysy boıynsha balada asfıktsııa bolǵan. ıAǵnı qusý massasy», - dedi Aıjan Esmaǵambetova Ortalyq kommýnıkatsııalar qyzmeti alańynda ótken baspasóz máslıhatynda.

Sondaı-aq tilshi suraq-jaýap barysynda oqýshynyń ólimine koronavırýs sebep bolýy múmkin be dep naqtylady. Spıkerdiń aıtýynsha, koronavırýstyń qatysy joq.

Eske salaıyq, keshe birqatar buqaralyq aqparat quraly Qaraǵandyda tumaýmen aýyrǵan 2-synyp oqýshysy qaıtys bolǵany týraly jazǵan edi.

Buǵan deıin Densaýlyq saqtaý mınıstrligi elimizde bala óliminiń artqanyn rastady.

Bıyl 9 aıda sábılerdiń ólim-jitimi 8,18% qurady. Ótken jyldyń 9 aıynda náreste ólimi 7,92% bolǵan. ıAǵnı bıyl 2021 jylmen salystyrǵanda ósim bar.

Odan bólek, vedomstvodan balalar arasynda tynys alý aǵzalary aýrýlary, qan jáne qan túzý, as qorytý júıeleri, jaraqattar, ýlaný men syrtqy sebepter áseri saldarynan paıda bolatyn aýrý túrleriniń jıi kezdesetini aıtyldy.