Qaraǵandyda Núrken Ábdirovke arnalǵan eskertkish jańartyldy

QARAǴANDY. QazAqparat – Qaraǵandyda qalpyna keltirilgennen keıin Keńes Odaǵynyń Batyry Núrken Ábdirovke arnalǵan eskertkish ashyldy. Músin qoladan jasalǵan, salmaǵy eki tonnaǵa jýyq, dep habarlaıdy QazAqparat tilshisi.

Eskertkishtiń ashylý saltanatyna QR Sýretshiler odaǵy Qaraǵandy oblystyq uıymynyń, tarıhı-mádenı murany saqtaý ortalyǵynyń ókilderi, sondaı-aq batyrdyń jıeni Ábýbákir Ábdirov qatysty.

«Bizdiń otbasymyz úshin bul óte mańyzdy oqıǵa. Batyr atamyzdyń esteligi máńgige saqtalatynyna rızamyz. Qalpyna keltirý jumystary bastalǵannan, aıaqtalǵanǵa deıin komıssııa músheleri menimen baılanysta boldy, olar maǵan eskızdi kórsetti, jumys barysyn aıtyp otyrdy. Eskertkish keremet bolyp shyqty», – dedi otstavkadaǵy polkovnık Ábýbákir Ábdirov.

Jumystardy elordalyq «KazArt» qazaqstandyq kórkemsýret kombınaty» JShS merdiger kompanııasy oryndady. Eskertkish – shoıyn prekýrsorynyń dál kóshirmesi.

«Men ózim Qaraǵandyda dúnıege keldim jáne bul eskertkishtiń qala men oblys úshin qandaı tarıhı qundylyǵy bar ekenin bilemin, sondyqtan biz jumysqa erekshe yqylaspen qaradyq. Eskertkishtiń jalpy salmaǵy eki tonnaǵa jýyq. Sondaı-aq, tuǵyrdaǵy plıtalardy aýystyrdyq», – dedi «KazArt» qazaqstandyq kórkemóner kombınaty» JShS bas dırektory Sapar Shaımardanov.

Núrken Ábdirovtiń eski shoıyn eskertkishi qalpyna keltiriledi. Ony Qaraǵandy murajaılarynyń biriniń qoryna tapsyrady.

«Shoıyn eskertkish 1958 jyly ornatyldy. Osy jyldar ishinde ol aýa-raıynan qatty zardap shekti, kóptegen jaryqtar paıda boldy. Ony qalpyna keltirý múmkindigi berilgen kezde, biz eń aldymen Sýretshiler odaǵy arqyly onyń avtorlarynyń biri – Germanııada turatyn ıÝrıı Gýmmelmen baılanysqa shyqtyq.

Ol qalpyna keltirýge ruqsat berdi», – dedi tarıhı-mádenı murany saqtaý ortalyǵy dırektorynyń orynbasary Janbolat Májıtov.

Monýmenttiń jalpy bıiktigi – 9 metr. 1982 jyly ol Respýblıkalyq mańyzy bar Qazaqstannyń tarıh jáne mádenıet eskertkishteriniń tizimine engizildi.