Qaraǵandyda muqtaj otbasyǵa tórt bólmeli úı syıǵa tartyldy

QARAǴANDY. QazAqparat – «Shańyraq» kóp balaly otbasylardy qoldaý ortalyǵy muqtaj otbasyǵa úı syılady. Turǵyn úıdi satyp alýǵa jergilikti metsenat kómektesti, dep habarlaıdy QazAqparat tilshisi.

Erkegúl Dosmaǵulova eki bala tárbıelep otyr, úlkeni – 12 jasta, al kenjesi – 8 aılyq. Bir jyldan astam ýaqyt boıy jalǵyzbasty ana balalarymen birge jeke úıdiń jertólesinde turdy, onda ol ot jaǵýshy jáne kómekshi bolyp jumys istedi.

Qıyn jaǵdaıda Erkegúlge qoǵam belsendisi Lázzat Qojahmetova basqaratyn «Shańyraq» kóp balaly otbasylardy qoldaý ortalyǵy kómektesti.

«Buryn páter jaldap turatynbyz. Men jeke kásipkerdiń qol astynda tazalaýshy bolyp jumys istedim. Karantın kezinde, pandemııa sharyqtap turǵan shaqta qatty qınaldyq. Maǵan úı jaldap turýdan bas tartýǵa týra keldi, men jumys berýshiden maǵan turǵyn úımen kómektesýdi ótindim. Ol bizge úıiniń jertólesinde bólme berdi.

Ol úshin men oǵan óte rızamyn. Dál osy kezeńde Lázzat Qojahmetovamen tanystym. Ol bizge azyq-túlikpen, zattarmen kómektesti, al jaqynda onyń kómegimen biz baspanaly boldyq», – deıdi Erkegúl.

Bul otbasyna baspana satyp alýǵa metsenat kómektesti, ol óz esimin ataýdan bas tartty. Erkegúl resmı túrde úıdi ıelený quqyǵyna ıe boldy.

«Biz eki jyl boıy qamqorlyǵymyzdaǵy muqtajdarǵa qol ushyn sozyp kele jatqan metsenatqa rızamyz. Ótken jyly ol jeti otbasyna úı satyp alýǵa kómektesti.

Bıyl biz alty otbasyna baspana satyp aldyq, jýyrda taǵy bir páter alamyz.

Bul adam bizdiń qamqorshylarymyzǵa turǵyn úıdi jalǵa alý úshin aqy tóleýge kómektesedi. Bizdiń qoǵamda osyndaı adamdardyń bar ekenine qýanyshtymyz», – dep atap ótti Lázzat Qojahmetova.