Qaraǵandyda merdigerler asfalti qarmen birge «erip» ketken joldardy qaıta jóndeıdi

QARAǴANDY. QazAqparat – Kóktem bastalysymen Qaraǵandy joldarynyń jaı-kúıine qatysty shaǵymdar qaıtadan údeı tústi. Merdigerler kepildik mindettemesi sheńberinde kemshilikterdi túzetýi tıis, dep habarlaıdy QazAqparat tilshisi.

Qaraǵandy qalasy ákimdiginde ótken jıynda joldardyń jaǵdaıy talqylandy. Qala basshysy Ermaǵanbet Bólekpaev merdigerlerdi ǵana emes, tehnıkalyq qadaǵalaýdy da synǵa aldy.

«Jylda osylaı! Jumys isteı almasańyzdar nege tenderge qatysasyzdar? Onda naryqtan ketińizder, basqalar bar», – dep eskertti Ermaǵambet Bólekpaev.

Ol jumys barysynda aqaýlardy kózden tasa etken tehnıkalyq qadaǵalaý uıymdaryna qatysty is qozǵaýdy talap etti.

Al merdigerler óz kezeginde jergilikti klımattyq jaǵdaıǵa tótep bermeıtin bıtým sapasyn synǵa alyp otyr.

Jıynda jóndeýden keıin asfalty úgilip, shuńqyrlar men jyryqtar tabylǵan árbir kóshe talqylandy.

«Bizdegi ortaq jol jelisi – 920 shaqyrym. Onyń 104,1 shaqyrymyna kepildik qyzmet kórsetilip otyr. Barlyǵy 62 ýchaskege kepildik berilgen. Búgingi kúni kóktemgi tekserý jumystary bastalǵanǵa deıin aldyn ala 10 ýchaskede aqaý bar ekeni anyqtaldy», - dep málim etti kommýnaldyq sharýashylyq, jolaýshylar kóligi jáne avtomobıl joldary bóliminiń basshysy m. a. Rústem Qojaqapanov

Onyń sózinshe, avtoparktermen birlese otyryp júrgizýshiler eń kóp shaǵymdanatyn joldardyń tizimi jasalǵan.

Oǵan Qazybek bı aýdanynda 10, Álıhan Bókeıhan aýdanynda 11 nysan engen.

Merdigerlerge asfaltty qalpyna keltirý tapsyryldy. Jumys aýa raıy qolaıly bolǵan kezde bastalýy kerek.

Al buǵan deıin ýaqytsha sharalar qabyldanady – shuńqyrlar taspen jabylady.

Qalada qar tazalaý jáne shyǵarý jumystary qarqyndy júrip jatyr.

Ermaǵambet Bólekpaev bul jumysqa múmkindiginshe búkil kúshti jumyldyrýdy, sondaı-aq nóser aǵynyn ýaqtyly tazalaýdy tapsyrdy.