Qaraǵandyda Málik Imashevqa eskertkish taqta ornatyldy

QARAǴANDY. QazAqparat – Qala ákimdiginiń qoldaýymen memleket jáne qoǵam qaıratkeri Málik Imashevqa eskertkish taqta ilindi, dep habarlaıdy QazAqparat.

Málik Imashev – Qazaq KSR baspa úzdigi. Obkom hatshysy bolǵan. QR eńbek sińirgen mádenıet qaıratkeri. Qaraǵandy qalasynyń jáne Shet aýdanynyń qurmetti azamaty. Baspa, polıgrafııa jáne kitap saýdasy oblystyq basqarmasyn basqardy. Eskertkish taqta ózi 20 jyl basqarǵan «Polıgrafııa» óndiristik birlestigi ǵımaratynyń qabyrǵasyna ilindi.

«Bul kisiniń eńbegi, jasap ketken qyzmeti, qaldyrǵan izi jas urpaqqa, óskeleń urpaqqa úlgi-ónege dep sanaımyn», - dedi oblystyq máslıhat tóraǵasy Núrken Qobjanov.

«1975 jyly birge jumys istedim. Qyzmette jetekshim ári ákemdeı boldy. Búgin oblystyń túkpir-túkpirinen áriptesterimiz keldi. Gollandııa, Aýstralııa, Germanııadan qońyraý shalyp, quttyqtap jatyr. Óte qýanyshtymyz», - dedi Nına Goncharova.

Foto: gov.kz

 

«1990 jyldardyń aýyr kezeńinde qarjylandyrý taba almaı otyrǵan «Shahter» klýbynyń máselesin sheshýge atsalysty. Stadıondy jekeshelendirýge ótip ketýden saqtap qaldy. Osy erlikteriniń ózin maqtan tutamyn. Ákeme kórsetilgen qurmet úshin otbasymyz atynan alǵys bildiremin», - dedi uly Valerıı Imashev.

Málik Imashulynyń tusynda oblystyń polıgrafııa júıesinde, qalalyq, aýdandyq gazet, kitap saýdasynda iri qaıta qurýlar bolǵan. Polıgrafııalyq materıaldardyń býhgalterlik esebin júrgizý, tapsyrystardy dıspetcherleý baǵdarlamasyn jasaǵan.