Qaraǵandyda qyz balany shashynan julqylaǵan balabaqsha qyzmetkeri jazalandy

QARAǴANDY. QazAqparat - Qaraǵandydaǵy balasy «Arman» balabaqshasynda bilim alatyn ata-ana mekeme qyzmetkeri balaǵa qol kóterdi dep shaǵymdanǵan. Beınebaqylaý kameralarynan belgili bolǵandaı, tárbıeshi kishkentaı qyzdy shashynan julqylaǵan. Qalalyq bilim bólimi qyzmettik tekserý ótkizip, onyń nátıjelerin málimdedi, dep habarlaıdy QazAqparat tilshisi.

Áleýmettik jelilerde Qaraǵandy qalasynyń Maıqudyq shaǵyn aýdanynda ornalasqan «Arman» balabaqshasynyń beınebaqylaý kameralarynan alynǵan vıdeo tarady.

Onyń sıpattamasynda avtor Maıqudyqtyń 12-shi shaǵyn aýdanda ornalasqan «Arman» bóbekjaıynda qyz balany tárbıeshi shashynan julqylaǵanyn jazady.

«Men muny beıneden kezdeısoq baıqap qaldym. Bálkim qyz balanyń ata-anasy balasyn kimge senip qaldyratynyn bilmeýi múmkin. Mine, balalarymyzǵa degen qarym-qatynastary qandaı...» - dep jazady jarııalanym avtory.

Osy oqıǵadan keıin qalalyq bilim bólimi balabaqshada qyzmettik tekserý júrgizdi.

«Qurmetti ata-analar! Qaraǵandy qalasynyń «Arman» balabaqshasyn tekserý aıaqtaldy. Qyzmettik tergeý nátıjeleri boıynsha tárbıeshiniń kómekshisi QR Eńbek kodeksiniń 49-babynyń 3-tarmaǵyna sáıkes jumystan shyǵaryldy. Mektepke deıingi uıymnyń dırektoryna qatań sógis túrinde tártiptik jaza qoldanyldy. Balalarǵa qatysty fızıkalyq, moraldyq jáne psıhologııalyq zorlyq-zombylyq ádisterin qoldanýǵa jol berilmeıtinin eske salǵymyz keledi», - dep habarlady Qaraǵandy qalasynyń bilim bólimi.