Qaraǵandyda kúli az, sapasy joǵary kómir shyǵarylady

QARAǴANDY. QazAqparat – Qaraǵandyda kúli az qalatyn, sapasy joǵary kómir shyǵaryla bastaıdy. Jańa baıytý fabrıkasynyń TMD elderinde balamasy joq. Іri joba QR Premer-Mınıstriniń orynbasary Roman Sklıar men Qaraǵandy oblysynyń ákimi Jeńis Qasymbektiń qatysýymen iske qosyldy, dep habarlaıdy QazAqparat tilshisi.

Jobanyń quny 12 mlrd teńgeni qurady. Ony júzege asyrýdyń arqasynda 110 jańa jumys orny ashyldy. Fabrıkanyń qýattylyǵy – saǵatyna 300 tonna nemese jylyna eki mıllıon tonna baıytylǵan kómir.

«Qaraǵandy oblysy – bul shıkizat óndirýden bastap qaıta óńdeýge deıingi ónerkásiptik klasterler qurylatyn ındýstrııalyq óńir. Búgin biz jańa tehnologııalardy paıdalana otyryp salynǵan baıytý fabrıkasynyń ashylýyna qatysyp otyrmyz. Qaz Carbon kompanııasynyń iri ınvestıtsııalyq jobalardy iske asyrýda úlken tájirıbesi bar. Ótken jyly osy alańda quıý óndirisin aýqymdy jańǵyrtý júrgizildi. Al jaqyn arada jańa ferroqorytpa zaýyty iske qosylady dep kútilýde», – dedi Roman Sklıar.

Kásiporynda «dymqyl baıytý» tehnologııasy qoldanylady. Búkil protsedýra qorshaǵan ortaǵa zııan keltirmesten jabyq tsıklde júredi. Óndiris protsesi tolyǵymen avtomattandyrylǵan. Álemdik tehnologııalyq ázirlemelerdi qoldaný jáne jańa jabdyqtardy ornatý «Indýstrııa 4.0» baǵdarlamasynyń parametrlerine sáıkes keledi.

«Ónerkásip qurylys kezeńiniń ózinde zamanaýı aqyldy tehnologııalardy engizýdiń úlgisine aınaldy. Sondaı-aq, jergilikti ekonomıkany qoldaýdyń úlgisi bolyp otyr. Óndiris úshin shıkizat bizdiń qaraǵandylyq kómir bolyp tabylady. ıAǵnı, qazaqstandyq qamtý úlesi 100%-dy quraıdy. Eń bastysy, kásiporynda 100-den astam jańa turaqty jumys ornyn ashyp, óńirdiń damýyna oń áleýmettik-ekonomıkalyq yqpal etedi», – dep atap ótti Jeńis Qasymbek.

Ónimderdi eksportqa jiberý josparlanýda. Bir bóligi Qaraǵandy ferroqorytpa zaýytynyń qajettilikterine jumsalady.

Jobany iske asyrý óńir ekonomıkasyn ártaraptandyrýǵa, óńdeý ónerkásibindegi eńbek ónimdiligin arttyrýǵa yqpal etedi.

Roman Sklıar Qaraǵandy oblysyna jumys sapary barysynda «Santehprom» JShS-da bolyp, oǵan óndiristi jańǵyrtý jospary tanystyryldy. Sonymen qatar, vıtse-premer óńirde «Taý-Ken Samuryq» UTK» AQ jobalarynyń júzege asyrylý barysymen tanysty.