Qaraǵandyda qubyr jarylyp, ondaǵan úı sýsyz qaldy

QARAǴANDY. QazAqparat – Qaraǵandyda Suryptaý shaǵyn aýdany jáne Kompaneıs kentiniń turǵyndary birneshe saǵat boıy sýyq sýsyz otyr. N6 magıstraldyq sý qubyrynda dıametri 500 mm bolatyn jaryq paıda boldy, dep habarlaıdy QazAqparat.

22 mamyr saǵat 23:48-de N6 magıstraldyq sý qubyrynda aqaý paıda boldy. Suryptaý turǵyndaryna sý beretin polıetılen qubyrdyń dıametri 500 mm bolatyn bóligi zaqymdalǵan. Apattyń týyndaýyna baılanysty «Qaraǵandy Sý» JShS túngi saǵat 1.30-da tutynýshylarǵa sý berýdi toqtatty. Qazirgi ýaqytta kompanııanyń jumys brıgadalary qalpyna keltirý jumystaryn júrgizip jatyr.

«Qazirgi ýaqytta qubyrdyń zaqymdaný sıpaty týraly aqparat joq. Aýyr arnaıy tehnıkanyń kirýine múmkindik jasaý úshin topyraq ázirleý, sý aıdaý, kiretin joldardy retteý jumystary júrgizilip jatyr. N6 magıstralindegi polıetılen sý qubyry 2009 jyly paıdalanýǵa berilgen», - dep habarlady «Qaraǵandy Sý» JShS baspasóz qyzmeti.

23 mamyr kúni tańerteń arnaıy kóliktermen sý tasymaldandy. Kompanııa birinshi kezekte aýrýhanalar men mektepterge, sondaı-aq tutynýshylarǵa ótinimder boıynsha sý jetkizdi. Sý tasymaldaýǵa ótinimderdi kelesi telefon nómiri arqyly berýge bolady: 47-11-16.

Qaraǵandy qalasy ákimdiginiń málimetinshe, «Qaraǵandy Sý» JShS uzyndyǵy 1116 km bolatyn qalanyń barlyq sý qubyrlarynyń 768 shaqyrym qubyryn aýystyrǵan. Aldaǵy ýaqytta taǵy 300 shaqyrymnan astam qubyr aýystyrylýy tıis.