Qaraǵandyda kóshe oıylyp onda úlken shuńqyr paıda boldy

QARAǴANDY. QazAqparat - Qaraǵandyda Ermekov kóshesiniń boıynda jolaýshylar kóligi aıaldamasynyń jańynda úlken shuńqyr paıda boldy. Tótenshe jaǵdaı jeksenbi kúni oryn aldy. Shuńqyrdy birinshi bolyp kýágerler kórgen.

Qalalyq ákimdik muny nóserlik káriz júıe jumysynyń tıimsizdigimen túsindirdi.

«Nóserlik káriz júıe jumysynyń tıimsizdigi saldarynan, keı aýlalarda ol múldem joq, barlyq jaýyn sýy qalalyq kárizdik júıege quıylady. Bul kezeńde júıege artyq júkteme túsip,  qubyrlar qosylatyn jer, temirbeton shaıylýda, bul qubyrlardyń, konstrýktsııalardyń tozýyna ákeledi, sóıtip kollektor opyrylady. Kollektorlardyń kóbi turǵyn úı salynǵan aýmaqpen, saıabaqtarmen, temir jol boıymen ótedi», - dep habarlady Qaraǵandy qalalyq ákimdiginiń baspasóz qyzmetinde.

Qazir qaýipti jerdi qorshaýǵa aldy. Jaıaý júrginshilerdiń qaýipsizdigi boıynsha tıisti sharalar qabyldandy. Ýaqytsha aıaldama pavılony ornatyldy.
«Qaraǵandy Sý» JShS brıgadalary bas kárizdik kollektordyń buzylǵan ýchaskesin almastyrý boıynsha jumystar júrgizip jatyr. Jumystar aıaqtalǵan soń joldy abattandyrý jáne asfalt tóseý boıynsha sharýa atqarylady», - dep qosty qalalyq ákimdiginiń baspasóz qyzmetinde.
Qalalyq ákimdik aqparatynsha, dıametri 1 000 mm, uzyndyǵy  9,2 km quraıtyn bas kárizdik  kollektor 1962 jyldan paıdalanylyp keledi. Kollektordyń kárizdik qubyrlary  tozǵan jáne ony paıdalaný merzimi aıaqtalǵany habarlandy.