Qaraǵandyda kóshe boıyna 2 tonna benzın tógildi

QARAǴANDY. QazAqparat – Qaraǵandy qalasynyń 15 magıstral jolynda benzın tasymaldaıtyn júk kóligi aýdarylyp qaldy. Apat saldarynan jolǵa 2 tonnaǵa jýyq janar-jaǵarmaı tógildi, dep habarlaıdy QazAqparat tilshisi.

16 aqpanda saǵat 12:15-te Qaraǵandy qalasynyń 15 magıstrali men Popov kóshesiniń qıylysynda benzın tasymaldaıtyn kólik aýdarylyp qaldy. Qaraǵandy oblysy PD baspasóz qyzmetiniń habarlaýynsha, aldyn ala málimetterge sáıkes «KamAZ» (benzın tasýshy) avtokóliginiń júrgizýshisi rýldi basqara almaı qalyp, saldarynan 20 tonnalyq jartylaı tirkeme aýdarylyp ketken. Oqıǵa nátıjesinde jol tósemine 2 tonnaǵa jýyq benzın tógildi.

«Otynnyń tógilgen jerinde órt paıda bolǵan joq, benzın 300 sh. m. jerge jaıylyp ketti. TJD kúshimen benzın tógilgen jerge aýa-mehanıkalyq kóbik quıyldy. Qaza bolǵandar men zardap shekkender joq. Polıtsııa kúshimen jol ýchaskesi ýaqytsha jabyldy. Tsısterna TJD jáne «GazOılProm» JShS birlesken kúshterimen kóterildi», - dep habarlady Qaraǵandy oblysy TJD baspasóz qyzmeti.

Sondaı-aq, bul fakt polıtsııada tirkelip, tıisti saraptamalar taǵaıyndaldy, olardyń nátıjeleri boıynsha protsessýaldyq sheshim qabyldanady.