Qaraǵandyda kópqabatty úıdiń terezesinen eki jasar bala qulap, mert boldy

QARAǴANDY. QazAqparat - Qaraǵandyda kópqabatty úıdiń terezesinen eki jasar bala qulap ketken. Sábı alǵan jaraqattarynan oqıǵa ornynda qaıtys boldy, dep habarlaıdy QazAqparat tilshisi.

Qaıǵyly jaǵdaı 9 mamyr kúni Qaraǵandy qalasynyń Stepnoı-3 shaǵynaýdanynda bolǵan.

«2021 jyly týǵan bala 7-shi qabattaǵy páterdiń terezesinen qulap, alǵan jaraqattarynan sol jerde qaıtys boldy», - dep habarlady Qaraǵandy oblysy TJD baspasóz qyzmeti.

Qutqarýshylar ata-analar men eresekterge qaýipsizdik sharalaryn saqtaý kerektigin taǵy da eske salady.

Balalardyń terezeler men balkondardan qulap ketýine jol bermeý úshin kelesi qaýipsizdik sharalaryn saqtaý kerek:

- kishkentaı balalardy qaraýsyz qaldyrmańyz;

- balanyń terezege kóterilýine jol bermeý úshin jıhazdyń barlyq túrlerin terezelerden alystatyńyz;

- masalardyń torlaryna senbeńiz;

- balaǵa terezeni birneshe santımetrden artyq ashýǵa múmkindik bermeıtin terezelerge arnaıy bekitkishter qoıyńyz;

- balalarǵa ashyq terezege shyǵýdyń qaýipti ekenin túsindirińiz;

- eger qulyptaý qurylǵysyn ornatý múmkin bolmasa, terezeniń tutqasyn qajet bolǵan jaǵdaıda burap alyp tastańyz.

Barlyq oqıǵalar men TJ faktileri týraly – 112, 101 nemese 8(7212) 43-36-36, 43-37-37 telefondaryna habarlasýǵa bolady.