Qaraǵandyda kópbalaly ana 4 balabaqsha ashty
«Aınagúl Hamıtova jeti balanyń anasy, 720 oryndyq 4 jekemenshik balabaqsha ashty. Men ol nysandarda boldym, tamasha jaǵdaı, jańa ádistemeler qoldanatyndaryn óz kózimmen kórip qaıttym», - dedi Erlan Qoshanov.
Óńir basshysy memlekettik-jekeshelik áriptestik arqyly Elbasynyń 3-6 jas aralyǵyndaǵy balalardy 100% balabaqshamen qamtamasyz etýge qatysty tapsyrmasy oryndalǵanyn atap ótti. Memlekettik tapsyrystyń ulǵaıýy kásipkerlerdi eki ese derlik yntalandyrdy. Tek bir jyl ishinde oblysta 20-dan astam jekemenshik balabaqsha ashyldy.
«Budan basqa, endi ata-analar ınternet arqyly kezekke turyp, balabaqshaǵa oryn ala alady. Bul sybaılas jemqorlyq qaýpin 100% - ǵa tómendetedi. Endi bizdiń mindetimiz - 3 jasqa deıingi balalar men erekshe qajettilikteri bar balalardy balabaqshamen qamtamasyz etý», - dep atap ótti oblys ákimi.
Óńir basshysy bilim berýdi damytý týraly da toqtalyp ótti. Ótken jyly oblysta eki jańa mektep salyndy. Bıylǵy jyly taǵy úsh nysan salynýda. Ákimniń aıtýynsha, osy jobalardy júzege asyrý arqyly oblysymyz úsh aýysymdy oqytýdan tolyq qutylady.
Ótken jyly 228 mektepti jóndeýge 6,5 mlrd teńge jumsaldy. Óńir basshysy barlyq mektep ınternattary qalypqa keltirilgenin eske saldy. Osyǵan deıin olardyń basym bóligi apattyq jaǵdaıda bolǵan. Endi ol ınternattar kúrdeli jóndeýden ótkizildi: shatyrlary, elektr jelileri, jylytý júıeleri, santehnıkasy aýystyrylyp, jańa jıhaz satyp alyndy, oqýshylar úshin demalý jáne turǵyn bólmeleri jabdyqtaldy.
Qaraǵandy oblysynda barlyǵy 21 mektep janyndaǵy ınternattar jumys isteıdi. Olardyń 12-de kúrdeli jóndeý, al toǵyzynda aǵymdaǵy jóndeý jumystary júrgizildi.