Qaraǵandyda kolledj murajaıynda erekshe fotomura saqtaýly tur

QARAǴANDY. QazAqparat – Qaraǵandyda fotograf Pevel Kýnınge arnalǵan «Sheber týraly estelik» atty kórme ótip jatyr. Kórermen nazaryna usynylǵan jádigerler arasynda osydan týra 77 jyl buryn túsirilgen fotosýret bar, dep habarlaıdy QazAqparat tilshisi.

Kólemi alty da toǵyz kishkentaı fotosýret. Tarıhtyń shynaıy dáleli. Fotoda jaýyngerler jeńiske qýanyp bılep jatyr.

Artqy jaǵynda «1945 jylǵy 9 mamyr. Berlın mańynda» degen jazý bar. Kadr ortasynda - Pavel Kýnın, keıinirekte fotoónerimen Qaraǵandyny dańqqa bólegen tulǵa.

«Pavel Semenovıchpen kezdeısoq kezdestik. Birde ol maǵan kóshede «Sýretke túskińiz kelmeı me?» dep surady. Sodan keıin bizdiń kınomehanıkterdi daıyndaıtyn mektepke jıi keletin boldy. Jigittermen sóılesip júretin. Ol jaqsy áńgimeshi edi. Optımıst. Biz ony pysyq dep ataıtynbyz. Kóp jyldar Jeńis kúnin birge atap óttik. Ol árqashan alıýmınıı krýjkasyn ala keletin. Bizge óz jumystary men fotosýretterin jeke muraǵattan syıǵa tartty. Onyń biri men úshin óte qymbat, ol sýrette jas jaýyngerdiń «ıAblochko» ánine bılep jatqany beınelengen», - dep eske alady Qaraǵandy qalasy № 9 kásiptik mektebiniń burynǵy dırektory Raısa Tamabaeva.

Kolledj murajaıynda Uly Otan soǵysynyń qatysýshylaryna arnalǵan jeke stend bar.

Oqytýshylar men oqýshylardyń qolymen jasalǵan albomdarda ardagerler týraly estelik saqtalǵan.

Pavel Kýnın (1925 – 2000) Tambov oblysynyń Novoıýrevo aýylynda dúnıege kelgen. 1943 jyly qańtarda áskerge shaqyryldy, biraq áli 18 jasqa tolmaǵan edi.

Maıdanǵa attaný úshin ol ózine jas qosyp alǵan. Zenıttik artıllerııada qyzmet etti. Stalıngradtan Berlınge deıin ótip, soǵysqa qatysqan.

Ol Reıhstagqa óz qoltańbasyn qaldyrǵandardyń biri boldy.

Jaýyngerlik eńbegi úshin «Qyzyl Juldyz» ordenimen, sondaı-aq «Stalıngradty qorǵaǵany úshin», «Varshavany azat etkeni úshin», «Berlındi alǵany úshin» medaldarymen marapattalǵan.

Germanııada alǵash ret kamerany qolyna alǵan. Shtabtyń janynda shaǵyn fotostýdııa boldy.

Demobılızatsııadan keıin Pavel Kýnın týǵan aýylyna oraldy. Mektepte beıneleý jáne sýret muǵalimi bolyp jumys istedi.

1953 jyly Qaraǵandyǵa keldi. Jáne zeınetke shyqqanǵa deıin «Tsentrkazgeologııada» sýretshi-bezendirýshi bolyp eńbek etken.

Búkil bos ýaqytyn fotosýretke arnady. Qaraǵandynyń alǵashqy fotoklýbyn uıymdastyryp, oǵan kórkemónerpazdar ujymy ataǵy berildi.

Ol «Kýnın áseri» dep atalyp ketken ózindik stılin ómirge ákeldi. Soǵys ardageriniń jaýyngerlik nagradalaryna shyǵarmashylyq marapattary qosyldy.

Onyń jumystary bedeldi halyqaralyq kórmelerde júlde aldy.

Fotografııa tehnıkasynda ol ártúrli janrda jumys jasady. Ásirese portretti jaqsy kóretin. Tájirıbe jasaýdan qoryqpaı, avangard stılinde jumys isteýge tyrysqan.

Pavel Kýnınniń fotoapparattarynyń biri oblystyq tarıhı-ólketaný murajaıynda saqtaýly.

Bul kúnderi «Sheber týraly estelik» kórmesi Sáýletshiler odaǵynyń úıinde ótip jatyr. Kórme mamyr aıynyń sońyna deıin jalǵasady.