Qaraǵandyda kóligimen dámhanany soqqan mas áıel 15 táýlikke qamaldy

QARAǴANDY. QazAqparat – Qaraǵandyda mas áıel jol talǵamaıtyn kóligimen kafeniń buryshyn qıratyp, oqıǵa ornynan qashyp ketýge tyrysqan, dep habarlaıdy QazAqparat tilshisi.

Oqıǵa senbiden jeksenbige qaraǵan túni boldy. 28 jastaǵy qaraǵandylyq áıel Núrken Ábdirov dańǵylynan Mustafın kóshesine buryla berer jolda ornalasqan dámhananyń buryshyna úlken jyldamdyqpen kelip soǵylǵan.

Alaıda, ol jolyna kedergi bolǵan tamaqtaný núktesin elemeı, ári qaraı úıine bet alǵan. Osylaısha oqıǵa ornynan qashyp ketpek bolǵan.

Kóliktiń dál koordınattary men bolǵan oqıǵa týraly aqparat polıtsııanyń barlyq patrýl ekıpajdaryna jiberilgen.

Mas júrgizýshini tártip saqshylary kelesi kósheden ustap alǵan. Áıelden alkogoldiń ıisi shyqqanyna qaramastan, ol medıtsınalyq tekserýden ótýden bas tartqan. Bul fakt resmı tirkelip, polıtseıler barlyq qajetti materıaldardy jınap, isti Qaraǵandy qalasynyń mamandandyrylǵan aýdanaralyq ákimshilik sotyna jiberdi.

«Kezekshi sýdıanyń qaýlysymen QR QK 610-babynyń 1 - bóligi, 611-babynyń 2-bóligi, 613-babynyń 4-bóligimen 28 jastaǵy qala turǵyny 15 táýlikke ákimshilik qamaýǵa alynyp, 8 jyl merzimge kólik quralyn júrgizý quqyǵynan aıyryldy», - dep habarlady Qaraǵandy oblysy PD baspasóz qyzmeti.

Sondaı-aq, ol dámhana ıesine keltirilgen zalaldy tóleýi tıis.