Qaraǵandyda kıbersport týrnıri aıaqtaldy

QARAǴANDY. QazAqparat – Qaraǵandyda Alaman Cup: Qarag'andy birinshi aımaqtyq kıbersport týrnıriniń chempıondary anyqtaldy, dep habarlaıdy QazAqparat tilshisi.

S. Sápıev atyndaǵy boks ortalyǵynda 23 aqpanda CS:GO jáne FIFA 2020 Alaman Cup: Qarag'andy Online CS: GO Qualifications boıynsha týrnırdiń fınaldyq oıyndary ótti.

Týrnırdi «Qazaqtelekom» AQ qoldaýymen Qaraǵandy oblysynyń aqparattandyrý, memlekettik qyzmet kórsetý jáne muraǵattar basqarmasy uıymdastyrdy.

Úsh oıynnyń qorytyndysyna FIFA 20 tártibi boıynsha QarMTÝ Aqparattyq tehnologııalar kolledjiniń oqytýshysy Aqnazar Bekseıitov jeńimpaz atandy. Oǵan 75 myń teńgeniń sertıfıkaty berildi.

Counter-Strike: Global Offensive synaǵynan eki komanda – Almatynyń zARLANS komandasy jáne Nur-Sultan qalasynyń AEZAKMI komandasy baq synasty. Kezdesý de_dust2 jáne de inferno kartalarynda 2:0 esebimen aıaqtaldy. Nátıjesinde chempıon ataǵyna almatylyq zARLANS komandasy ıe boldy. Olarǵa 300 myń teńgege sertıfıkat pen chempıon kýbogy tabys etildi.

Esterińizge sala keteıik, 15 aqpannan bastap biliktilik saıysy ótkizildi. Іrikteý oıyndaryna barlyǵy CS:GO boıynsha 229 komanda jáne FIFA 20 boıynsha 68 kıberfýtbolshy qatysty. Qazaq Cybersport Federation Alaman Cup týrnıri Qazaqstan aımaqtary boıynsha sherýdi jalǵastyrady. Federatsııanyń josparynda Semeı, Shymkent jáne Aqtaý týrnırlerin ótkizý kózdelgen. Budan basqa, aımaqtyq týrnırlerdiń jeńimpazdary arasynda Alaman Cup sýperkýbogy ótýi tıis.