Qaraǵandyda Keńes Odaǵy Batyrlarynyń alleıasy salynady

QARAǴANDY. QazAqparat - Qaraǵandy oblystyq ákimdiginde ótken jıynda UOS Jeńisiniń 70 jyldyǵyna daıyndyq máseleleri talqylandy, dep habarlady aımaq basshysynyń baspasóz qyzmetinen.

«Elbasy bul jyly UOS bir de bir ardageri nazarsyz qalmaýy kerektigin atap ótti. Bizdiń maqsatymyz - ardagerlerdiń problemalaryn sheship, ózimizdiń azamattyq boryshymyzdy oryndaý», - dedi oblys ákimi Nurmuhambet Ábdibekov.

Іshki saıasat basqarmasynyń basshysy Nurlan Rystın oblysta 19 myńnan astam ardager turatynyn aıtty.

«340 UOS qatysýshylary men múgedekteri, 1121 tyl eńbekkeri jáne soǵys jyldary kezinde kem degende alty aı jumys istegen 16 867 adam, 31 blokadashy, 137 kontslager tutqyny, 17 erikti jaldamaly quram tulǵalary, 867 soǵysqa qatysýshylardyń jesirleri bar», - dedi ol.

Oblysta soǵysqa qatysqandardyń barlyǵy kommýnaldyq qyzmet tólemderinen bosatyldy.

«Sáýir aıynyń sońyna deıin áskerı dańq eskertkishterindegi jóndeý jumystary aıaqtalady. 9 mamyrda Qaraǵandydaǵy «Máńgilik alaý» memorıalynda Keńes Odaǵy Batyrlary alleıasynyń tasyn qalaý kózdelgen. Ony 2 qyrkúıekte ashý josparlanyp otyr», - dedi N.Rystın.

3 mamyrǵa deıin soǵys ardagerleri men múgedekterge jáne ózge de tıisti jeńildik alatyn toptarǵa birjolǵy tólemaqy tólenýi tıis. Qaraǵandy oblysynda UOS qatysýshylary men múgedekteri Jeńis kúnine oraı 250 myń teńgeden: 100 myń teńge - respýblıkalyq bıýdjetten jáne 150 myń teńge - jergilikti bıýdjetten alady.

Jıyn sońynda oblys ákimi UOS Jeńisiniń 70 jyldyǵyna daıyndyq pen ony atap ótýge baılanysty birqatar tapsyrma júktedi.