Qaraǵandyda Qaýipsizdik keńesiniń kóshpeli otyrysy ótti

ASTANA. QazAqparat - Qaraǵandyda QR Prezıdentiniń kómekshisi - Qaýipsizdik keńesiniń hatshysy Vladımır Jumaqanovtyń tóraǵalyǵymen Qaýipsizdik keńesiniń otyrysy ótti, dep habarlaıdy Aqordanyń baspasóz qyzmeti.

Qaýipsizdik keńesiniń kóshpeli otyrysyna mınıstrlikterdiń, arnaýly jáne quqyq qorǵaý, sondaı-aq jergilikti atqarýshy memlekettik organdar basshylary qatysty.

Іs-shara barysynda óńirdegi ulttyq qaýipsizdikti qamtamasyz etý salasyndaǵy Memleket basshysy tapsyrmalarynyń oryndalý máseleleri qaraldy. Atap aıtqanda, qoǵamdyq qaýipsizdik, din salasynyń máseleleri, sondaı-aq terrorıstik qaýip-qaterge jáne tótenshe jaǵdaılarǵa qarsy áreket etýge daıyndyqtyń deńgeıi talqylandy.

Qaraǵandy oblysyndaǵy ahýaldy keshendi túrde zertteý maqsatymen Prezıdent Ákimshiliginiń, Bas prokýratýranyń, Ulttyq qaýipsizdik komıtetiniń jáne basqa da ókiletti organdardyń jaýapty qyzmetkerlerinen quralǵan vedomstvoaralyq jumys toby oblys ákimdigimen birlesip, shalǵaı ornalasqan qalalar men aýdandarǵa baryp, tıisti jumystar atqardy.

V.Jumaqanov jaýapty memlekettik organdarǵa Qaraǵandy oblysynyń tájirıbesi negizinde ázirlengen qorytyndylar men usynystardy eskerip, eldegi jalpy ulttyq qaýipsizdikke tónip turǵan syn-qaterler men qaýipter deńgeıin tómendetý jóninde jan-jaqty taldaý jasap, tıisti jumystardy uıymdastyrý qajet ekenin atap ótti.

Jumys qorytyndysy boıynsha ortalyq jáne jergilikti atqarýshy memlekettik organdarǵa naqty tapsyrmalar berildi.