Qaraǵandyda Káripbek Kúıikovtiń kórmesi ashyldy

QARAǴANDY. QazAqparat - Belgili sýretshi, antııadrolyq qozǵalystyń belsendisi Káripbek Kúıikov Semeı polıgony jabylýynyń 30 jyldyǵyna arnalǵan kórme usyndy. Ekspozıtsııa Qaraǵandynyń Dostyq úıinde ashyldy, dep habarlaıdy QazAqparat Qaraǵandy oblysy ákimdiginiń saıtyna silteme jasap.

«Men shyǵarmalarymda jan aıqaıyn beıneledim. Sebebi, men jáne meniń ata-anam - ıadrolyq synaqtardyń tiri kýágerlerimiz. Men týyp-ósken Egindibulaq aýyly polıgonnan júz shaqyrym jerde ornalasqan. Bala kezimde ata-anamnyń Semeıge jıi barǵany esimde. Sodan keıin olar kóbinese dala arqyly ótetin joldy qysqartyp, qıyp ótetin. Árıne, munyń bári bizge áser etti. Ózimniń sýretterim arqyly adamdarǵa ıadrolyq qarýdyń qaýiptiligi týraly jetkizgim keledi. Elestetip kórińizshi, eger ol terrorısterdiń qolyna tússe ne bolady? Sondyqtan antııadrolyq qozǵalys – bul meniń búkil ómirim», - deıdi Káripbek Kúıikov.

Dostyq úıinde qoǵam qaıratkerleriniń, ǵalymdardyń, etnouıymdar men «Jańǵyrý joly» jastar qozǵalysynyń belsendileriniń qatysýymen onlaın rejıminde «ıAdrolyq qarýsyz Qazaqstan – beıbitshilik pen kelisim eli» atty dóńgelek ústel ótti. Kezdesýdi oblystyń ishki saıasat basqarmasynyń «Qoǵamdyq kelisim» KMM uıymdastyrdy.

«Bıyl biz el Táýelsizdiginiń 30 jyldyǵyn atap ótemiz. Bul kún Semeı polıgonyndaǵy ıadrolyq synaqtardan bas tartýdyń 30 jyldyǵymen tuspa-tus keldi. 1991 jylǵy 29 tamyzda Elbasy Nursultan Nazarbaev sansyz azap shekken ıadrolyq jarylystardy toqtatyp, beıbitsúıgish el retinde búkil álemge Táýelsiz Qazaqstan Respýblıkasyn pash etti. Atom bombalarynyń jarylystarynan keıin qandaı qaıǵyly jaǵdaı bolǵanyn bárimiz este ustaýymyz kerek. ıAdrolyq synaqtar Semeı, Pavlodar jáne Qaraǵandy oblystarynda kórinis tapty. Jarylystardyń saldarynan bizdiń mıllıondaǵan azamattarymyz zardap shekti, al radıoaktıvti jaýyn-shashyn flora men faýnany joıdy. Munyń bárin umytpaý kerek», - dep atap ótti Qaraǵandy oblysy ishki saıasat basqarmasynyń basshysy Erlan Qusaıyn.

29 tamyz – qazaqstandyqtar úshin ǵana emes, búkil álemdik antııadrolyq qoǵamdastyq úshin de erekshe kún.

Esterińizge sala keteıik, Semeı polıgonynda alǵashqy synaq 1949 jyldyń 29 tamyzynda ótkizildi. Al 42 jyldan keıin sol kúni polıgon Qazaq KSR Prezıdenti Nursultan Nazarbaevtyń Jarlyǵymen resmı túrde jabyldy. 2010 jyldan bastap 29 tamyz Halyqaralyq ıadrolyq synaqtarǵa qarsy is-qımyl kúni retinde atap ótiledi.