Qaraǵandyda qala mańyna qatynaıtyn avtobýstar jolaqysy arzandaıdy

QARAǴANDY. QazAqparat – Qaraǵandy oblysynda jeti qala mańyndaǵy marshrýttarmen júrý arzanyraq bolady, dep habarlaıdy QazAqparat tilshisi.

«ONAY elektrondyq júıesin paıdalaný tájirıbesi Qaraǵandyda oń nátıje berýde. Búgingi tańda tólemderdiń 96%-y elektrondy túrde ótýde. Bul júıeni qalaaralyq avtobýstarda, atap aıtqanda seriktes qalalarda engizý keıbir marshrýttarda jol júrý qunyn eki esege jýyq tómendetýge múmkindik beredi. Aıyrmashylyq aıtarlyqtaı», — dedi oblys ákimi Ermaǵanbet Bólekpaev.

Jańa tarıf aı saıyn 500 myńǵa jýyq jolaýshyny tasymaldaıtyn marshrýttarda júzege asyrylady. Bul № 100 jáne 107 (Qaraǵandy — Temirtaý), № 121 (Qaraǵandy — Shahtınsk), № 122 (Qaraǵandy — Topar), № 127 (Qaraǵandy — Shahan), № 146 (Qaraǵandy — Abaı) jáne № 165 (Qaraǵandy — Saran) avtobýstar.

Qala mańyndaǵy marshrýttarda elektrondyq bıletteý júıesi engizilgennen keıin jolaýshylar QR, kólik kody nemese SMS kómegimen kólik kartasymen («Biryńǵaı», Virtual, «Áleýmettik», «Zeınetker») jol júrý aqysyn tólegen kezde 80 teńge tóleıtin bolady. «7—15 jastaǵy balalar» kartasy boıynsha jol júrý quny — 40 teńge.

Qazir Qaraǵandy — Shahtınsk avtobýstarynda jol júrý quny — 190 tg., Qaraǵandy — Topar — 180 tg., Qaraǵandy — Temirtaý — 150 tg., Qaraǵandy — Saran — 95 tg., Qaraǵandy — Abaı — 170 tg., Qaraǵandy — Shahan — 175 tg. Jol aqysyn qolma-qol tóleıtinder úshin baǵa ózgerissiz qalady.

Oblystyq marshrýttarda jeńildikter qoldanylmaıdy. «Áleýmettik» jáne «Zeınetker» kartalarynyń ıeleri úshin jol júrý jalpy tarıf boıynsha — 80 teńge bolady.

Sondaı-aq qala mańyndaǵy qoǵamdyq kólikti jańartý jalǵasady. Bıyl № 3 avtobýs parki QazTehna zaýytynan 25 jańa avtobýs satyp alýdy josparlap otyr.

Foto: gov.kz